元音圖

元音圖（粵拼：jyun4 jam1 tou4 ），又叫元音四邊形係語音學同音系學上成日用嘅一種圖，用圖像化嘅方式嚟表示一隻語言入便有邊啲元音，以及係每個元音嘅特性。喺廿一世紀初，元音圖通常都係畫做梯形嘅，所以又有咗個名叫元音四邊形。

廿一世紀初嗰陣嘅香港粵語嘅元音圖；幅圖淨係顯示咗啲單元音。

呢幅元音圖畫緊香港粵語嗰啲雙元音，例：
[u] → [i] 可以想像粵拼：ui1，例漢字：煨wui1
[i] → [u] 可以想像粵拼：iu1，例漢字：腰jiu1
... 等等。

基礎諗頭

内文：元音

睇埋：語音學同音系

元音圖個諗頭，建基於一個事實：就噉聽都聽得出，唔同嘅元音喺物理特性上有差異；而語音學（語言學嘅一個子領域，專研究講嘢嘅聲）研究表明，唔同嘅元音通常都只係會喺兩點上有差異—

• 個人發出呢吓音嗰陣，條脷最高嗰點嘅位置偏前（前元音）定係偏後（後元音）？元音圖打橫嗰條軸顯示隻元音係前定後。
• 個人發出呢吓音嗰陣，條脷嘅位置接近口嘅頂部（閉元音）定係離口嘅頂部有咁遠得咁遠（開元音）？元音圖打戙嗰條軸顯示隻元音係閉定開。

用廿一世紀初嘅粵語嚟做例子，粵語有前元音同後元音嘅對比—

閉前不圓唇元音（IPA：[i]）	→ 想像粵拼：i1	→ 有呢隻音嘅漢字：詩si1、資zi1、啲di1
閉後圓唇元音（IPA：[u]）	→ 想像粵拼：u1	→ 有呢隻音嘅漢字：夫fu1、姑gu1、烏wu1

兩者都係閉元音，分別在於 [i] 係一個前元音而 [u] 係一個後元音。

粵語亦有閉元音同開元音嘅對比—

閉前不圓唇元音（IPA：[i]）	→ 想像粵拼：i1	→ 有呢隻音嘅漢字：詩si1、資zi1、啲di1
開前不圓唇元音（IPA：[a]）	→ 想像粵拼：aa1	→ 有呢隻音嘅漢字：沙saa1、加gaa1、啦laa1

有更多元音係處於極端點之間，例子可以睇睇中元音（全開同全閉之間）—

中前圓唇元音（IPA：[ø]）

→ 想像粵拼：oe1

→ 有呢隻音嘅漢字：啹goe1 、鋸goe3

粵語喺元音上算係幾多變。相比之下，西班牙話嘅元音圖得嗰 5 款元音：

語言差異

睇埋：音系類型

唔同語言嘅元音圖個樣可以幾唔同：

• 首先最明顯嘅係，唔同語言有嘅元音都唔同，而且有啲語言明顯比較多單元音，又有啲語言明顯比較少單元音。有關少單元音嘅語言，可以睇睇下便北京標準官話、日本話同埋波蘭話嘅元音圖。
• 元音圖亦都展示咗元音分散嘅現象：首先，元音圖上嘅距離，真係反映緊條脷嘅位置，例如如果有個 [i] 真係畫正喺幅元音圖嘅左上角，就表示嗰個元音發出嚟嗰陣真係條脷去到最高（即係最閉）最前嗰個位；有語言學家觀察咗好多隻語言嘅元音圖，剖析唔同語言嘅元音分散規律（如果將啲元音用線連埋一齊，會出咩形狀？），發現好多語言嘅元音分散規律係大致呈三角形嘅，又有好多語言元音分散規律係大致呈梯形嘅。

有唔少語言類型學研究者都著重分析元音分散等嘅特性，想解答「點解某啲元音常見啲」等嘅問題。

以下係廿一世紀初多隻語言嘅元音圖。粵語同西班牙話嘅元音圖上便已經講咗，所以下便唔重複。

• 
  北京嘅標準官話
• 
  比利時嘅荷蘭話
• 
  葡國本土嘅葡萄牙話
• 
  法文
• 
  德文
• 
  日本話
• 
  韓國話
• 
  盧森堡話
• 
  波蘭話
• 
  河內嘅越南話
• 
  英格蘭諾列治嘅英文

引述

篇文用咗嘅行話，英文版本如下：

篇文引用咗以下呢啲文獻同網頁：

睇埋

• 粵語音系
• 語言類型
• 有聲國際音標元音表