剛體（粵拼：gong1 tai2；英文：rigid body）喺物理學分析上係指一件喺郁動過程當中唔會變形嘅理想物體。剛體嘅定義特徵係完全唔會變形－無論外界向嚿剛體施幾勁嘅力都好，嚿剛體內部啲粒子彼此之間嘅距離都完全唔會變，或者變嘅幅度細到可以忽略；喺現實世界，冇嘢係剛體－就算一支棒球棍用最精良嘅鋼（一種出嗮名硬淨嘅材料）造嘅都好，「支棍能夠頂得順幾勁嘅力」都實會係個有限嘅數值。
力學同工程學上嘅分析好多時會為咗簡單起見，假設分析嗰件物體係剛體，而喺實際應用上，物體郁動嗰陣嘅變形幅度通常都好細，所以呢種假設唔會影響個數學模型嘅準確度。
