和宜合

和宜合（英文：Wo Yee Hop）響香港荃灣北部，近城門，係峽，亦都係村。和宜合個峽響大帽山南面山腰，原本叫狐狸峽，英國人測量新界嗰陣寫做Wo Li Hop，因為狐狸響傳統上唔係好動物，所以條村改過個好意頭名，和宜合。和宜合東有菠蘿凹，西有荃灣老圍。荃灣葵涌發展之後，峽南係梨木樹邨。

狐狸峽集埋山水成涌，最後同埋幾個支流向南夾成葵涌，流入以前垃圾灣。家下象鼻山路以南全改成暗渠，垃圾灣已經係填地，山涌只淨返北面山坡。

英軍開過條路由荃灣老圍經狐狸峽，過菠蘿凹去城門，後尾條路變成象鼻山路，家陣係去城門隧道必經之路，而和宜合東面係城門隧道收費廣場。香港政府發展葵涌做新市鎮，響和宜合南面開山劈石，起梨木樹邨，亦都起咗條和宜合道由和宜合，經梨木樹邨，轉向石梨落葵涌中部，駁落青山公路。

和宜合村仍然響原地，個谷北邊，面積比以前大。原本村耕地就響南面谷地，自成一角，不過家下已經起晒嘢。和宜合村可以由和宜合道，經和宜合里或者城門道入村，沿道可以入響菠蘿凹。坳度起咗條菠蘿壩閘住城門水塘嘅水。