擬亂數產生

擬亂數產生（英文：pseudorandom number generation）指啲人嘗試用電腦產生一啲類似隨機嘅數。

呢一個課題喺密碼設計（睇密碼學）上好緊要，因為完全隨機嘅數字串係最難預測嘅，攞嚟做密碼最安全。但喺現實世界當中，電腦產生嘅嗰啲所謂隨機數字唔係真係隨機嘅，例如有好多電腦程式會噉樣做：個程式內置咗一條複雜嘅方程式，當用家要求佢產生一個隨機數字嗰陣，個程式會攞嗰一刻嘅時間（隨機種子；random seed）做條方程式嘅輸入，再俾返所計出嚟嗰個數做輸出。如果條方程式夠複雜，佢所產生嘅數列望落會好似隨機嘅噉，但實際上呢串數字依然係跟住一啲決定性嘅法則運行嘅，做唔到真正嘅隨機^[1]。