浪子嘅比喻

  「浪子回頭」跳轉到呢度。想搵歌，請睇「浪子回頭 (歌)‎」。

浪子嘅比喻係耶穌講嘅一個比喻，記載喺《新約聖經》《路加福音》第15章第11-32節。呢個故事係《路加福音》第15章裏面耶穌嘅比喻「三部曲」嘅最後一個，前面兩個比喻係迷羊嘅比喻同唔見錢嘅比喻。

聖經譯文

「	耶穌繼續話：「一個人有兩個仔。細仔對佢阿爸話：『阿爸，請你將我應得嘅產業分畀我。』佢阿爸就將產業分畀佢哋。過幾日，細仔就帶住錢，去好遠嘅地方。喺嗰度亂咁使錢，過放縱嘅生活。當佢啲錢都用晒，嗰個地方發生嚴重饑荒，佢就窮到連一個仙都冇。只好去投靠當地嘅一個居民；嗰個人打發佢到自己嘅農場去看豬。佢餓到要拎餵豬嘅豆莢嚟食，但係，連呢啲都冇人畀佢。最後，佢醒悟過嚟，就話：『我阿爸嗰度有好多僱工，佢哋糧食充足，我反而喺呢度餓死咩？我要起身，返去阿爸度，對佢話：阿爸！我得罪天，又得罪你；我再唔配做你嘅仔，請將我當做你嘅僱工啦！』 於是，佢起身返去阿爸度。佢離開屋企仍然好遠，佢阿爸見到佢，心裏面充滿憐憫，迎向前去，緊緊攬住個仔同錫佢。仔話：『阿爸！我得罪天，又得罪你，我再唔配做你嘅仔。』但係阿爸吩咐僕人話：『快啲拎最好嘅衫畀佢着，拎戒指畀佢帶，拎鞋畀佢着；然後拉隻肥牛嚟劏，等我哋開宴會慶祝！因為我呢個仔係死而復活，失而復得嘅。』佢哋大家都好開心。嗰時，大仔喺農場返嚟，離屋企冇幾遠，聽見音樂同跳舞嘅聲，佢叫一個僕人過嚟，問佢發生咩事。僕人答話：『你細佬返咗嚟，你阿爸因為見佢冇災冇病返嚟，劏咗隻肥牛。』大仔就好嬲，唔肯入去；佢阿爸就出嚟勸佢。佢對阿爸話：『我服事你咁多年，從來冇違背過你嘅命令，連一隻山羊仔等我同朋友熱閙一吓都未有過。但係你呢個仔，佢將你嘅財產都花喺娼妓身上，佢一返嚟，你反而為佢劏咗隻肥牛。』阿爸對佢話：『仔呀！你成日同我一齊，我一切所有嘅都係你嘅；但係你細佬係死而復活、失而復得嘅，我哋為佢開宴會慶祝係應該嘅。』」	」
——《路加福音》15章第11-32節

解釋

呢個比喻講到一個人有兩個仔，細仔向佢阿爸要求將應得嘅家產分畀佢，然後佢就去咗好遠嘅地方，亂咁使錢，過放縱嘅生活。後嚟啲錢用晒，嗰度又發生大饑荒，喺極大打擊之下，佢可以話係走投無路，已經冇其他辦法生活。無可奈何，為咗生活，佢去咗個農場做看豬，證明佢已經陷入絕望嘅困境之中。

細仔喺艱難嘅時刻裏面，醒悟過嚟，諗起自己屋企嘅溫暖。當一個人能夠醒悟就會有轉機，於是佢下定決心要返屋企。佢唔敢以仔嘅身份要求被接納，而係以最低級嘅僱工身份請求收容。阿爸卻畀佢一種驚人嘅看待，熱切為細仔籌備歡迎會，以迎接貴賓場合嚟準備一切。遠遠超過細仔佢所諗嘅，形成咗兩種鮮明嘅對比。

大仔喺田度做完嘢返嚟，聽到屋企度有音樂跳舞嘅歡笑聲，極為驚訝。因為自從細佬離開屋企之後，已經冇歡樂嘅聲音。當僕人話佢知，阿爸因為細仔平安無事噉返嚟，覺得好開心而搞宴會慶祝，大仔嘅反應係好嬲同好唔滿意。認為阿爸唔公平噉對佢，冇畀佢應得嘅待遇。大仔代表驕傲而自義嘅法利賽人，認為自己先至配得係模範嘅仔。阿爸唔會因為大仔冷漠嘅態度，而放棄迎接細仔嘅主意。呢個比喻解釋上帝對罪人回轉嘅歡迎同接納。