牛仔 (漫畫)
《牛仔》係香港嘅漫畫家王司馬喺1970年代至1980年代初所畫嘅四格漫畫系列。漫畫原本喺《明報》副刊連載多年，後來由博益出版集團有限公司將佢結集成書出版。牛仔全套有四十一冊，講述漫畫裏面「牛仔」同「契爺」兩父子之間嘅生活片段同趣事，樸實但生動噉描述當時香港小康之家嘅面貌，亦表現出牛仔嘅天真爛漫以及同爸爸嘅親情。
喺牛仔出世之前，先有「契爺」。契爺最初係喺王澤先生嘅《老夫子》度出現，因為初入漫畫行嘅王司馬無乜名氣，所以契爺只係間中同老夫子入面做客串，畀多啲讀者認識佢。後來，《明報》嘅創辦人查良鏞先生（武俠小說家金庸）慧眼識英雄，畀契爺獨立出來，同牛仔組成父子兵，每日為《明報》副刊廣大嘅讀者帶來溫情嘅歡笑。
《牛仔》漫畫除咗短標題之外，好少會加入文字。唯一可知嘅例外，係「學講國語」嗰一篇，牛仔喺電話筒對契爺講：「刮耳先知打痴飛濕唔痕」，聽得契爺一頭霧水。原來牛仔嘅手冊上面寫住「國語生字第七課（抄）十五行」。
另外，「契爺」嘅角色亦曾多次喺王澤嘅漫畫《老夫子》中客串出現。
牛仔同契爺嘅原型
編輯牛仔同契爺呢對父子嘅原型，其實係來自作者王司馬先生同佢嗰三個仔。光頭、咀上有一字鬍同鍾意戴煲呔嘅契爺，雖然同現實中嘅王司馬有啲分別，但佢愛仔嘅心就係無分別。成日着人字拖、留住湯碗頭嘅牛仔，亦係集合咗王司馬三個仔嘅天真、聰明同活潑喺一身，可以講，牛仔同契爺嘅故事就係王司馬父子嘅故事。
《牛仔》全套
編輯| 冊 | 標題 |
|---|---|
| 1 | 放風箏 |
| 2 | 射水槍 |
| 3 | 踩單車 |
| 4 | 吹口哨 |
| 5 | 洗白白．笑睬睬 |
| 6 | 打波波．喜滋滋 |
| 7 | 去街街．樂陶 |
| 8 | 騎牛牛．嘻哈哈 |
| 9 | 滿天星 |
| 10 | 捉魚仔 |
| 11 | 嘆世界 |
| 12 | 沙灘椅 |
| 13 | 另有風味 |
| 14 | 鬼馬波子棋 |
| 15 | 好好玩 |
| 16 | 精靈小象棋 |
| 17 | 兵捉賊 |
| 18 | 小皮球 |
| 19 | 糖黐豆 |
| 20 | 猜呈尋 |
| 21 | 小小大胃王 |
| 22 | 百厭神鎗手 |
| 23 | 活力機械人 |
| 24 | 頑皮污糟貓 |
| 25 | 足球小旋風 |
| 26 | 玩具愛燒友 |
| 27 | 現代釣魚郎 |
| 28 | 未來書法家 |
| 29 | 無限復活 |
| 30 | 鼠輩橫行 |
| 31 | 有腦時代 |
| 32 | 千里傳音 |
| 33 | 幾片雲 |
| 34 | 睡不着 |
| 35 | 新髮型 |
| 36 | 砌城牆 |
| 37 | 釣魚樂 |
| 38 | 洗白白 |
| 39 | 大手板 |
| 40 | 玩泥沙 |
| 41 | 牛仔再見 |
| 王司馬 | 牛仔10周年 |
| 契爺與牛 | 廉潔篇 |