獨裁者博弈
獨裁者博弈（粵拼：duk6 coi4 ze2 bok3 jik6）係博弈論上提到嘅一種「博弈」，屬於非對稱型。簡單講，其中一位博弈者會扮演「獨裁者」嘅角色，單方面噉決定一筆錢要點樣分。佢有權自己一個擸晒所有錢，等另外嗰一位博弈者乜錢都分唔到。除此之外，獨裁者博弈仲有一種變種，叫信任博弈。
嗌法
編輯獨裁者博弈：
信任博弈：
基本概論
編輯佈局
編輯獨裁者博弈個佈局同最後通牒博弈好相似，有時畀人當係最後通牒博弈嘅一個變種。
獨裁者博弈玩法如下：
- 對局有兩位博弈者，其中一位扮演「獨裁者」嘅角色。
- 研究者畀「獨裁者」得到一筆錢（例如 100 文），佢要做決策，將筆錢分做兩份，其中一份佢收，而另外一份就會由另外嗰一位博弈收到。
- 「獨裁者」有權選擇自己一個攞晒所有錢，等另外嗰位博弈者一文都攞唔到。
- 由頭到尾，「獨裁者」以外嘅博弈者冇權做任何嘅決定。
順帶一提，由於「獨裁者」以外嘅博弈者冇權做決定，而叫得「博弈」嘅理應係大家都有權做決定嘅，所以有學者主張，獨裁者博弈嚴格嚟講唔可以算係「博弈」嘅一種。
發現
編輯原則上，如果扮演「獨裁者」嗰位博弈者係廿世紀經濟學同博弈論心目中嘅「完美理性決策者」[註 1]，佢會完美噉做出對自己最有利嘅決定——即係話佢會諗都唔諗就決定要獨吞所有錢。現實嘅實驗發現，「獨裁者決定攞晒所有錢」的確係一個常見嘅情況，但係依然有相當數量嘅受試者會選擇 50:50 噉分錢。
信任博弈
編輯信任博弈，又或者叫信賴博弈，係獨裁者博弈嘅一款變種，特點大家都有得做決定，唔似得獨裁者博弈噉淨係得其中一方有權做決定。
喺古典嗰款信任博弈當中，會有兩位博弈者參與，佢哋當中有一位要扮演送錢方（sender），而另一位就要扮演收錢方（receiver），玩法係噉嘅[1]：
- 佢哋兩個人會收到一筆錢，例如係 1,000 文港紙咁多。
- 送錢方行先，佢可以揀「要將幾多嘅錢送去畀收錢方」。
- 送錢方傳咗嗰筆錢（T），跟住落嚟會變成三倍，例如送錢方傳咗 500 文（T = 500），嗰筆錢跟住會變成 1,500 文。
- 收錢方收到筆錢就到佢行，佢會知道送錢方做咗乜嘢決定，而佢要決定將佢得到嗰筆錢入面幾多嘅（Y）傳返去畀送錢方，收錢方有權自己擸晒成筆錢（Y = 0）。
喺經濟學同相關領域嗰道，呢種實驗被指可以用嚟研究信任。個諗頭係噉嘅：T 反映緊送錢方幾信賴對方，而 Y 就反映收錢方幾值得信賴—— T 數值越大，就越表示送錢方肯冒風險信對方，而 Y 數值越大就越反映收錢方唔會利用送錢方嘅信任。假如送錢方係完全「理性」冇任何信任可言（會假定對方只在意私利，假定咗 Y 會係 0）嘅，佢會選擇唔傳任何嘅錢（T = 0），但事實並唔係噉[2]。
相關
編輯註釋
編輯引咗
編輯- ↑ Berg, J.; Dickhaut, J.; McCabe, K. Trust, reciprocity, and social history. Games Econ. Behav. 1995, 10, 122-142.
- ↑ Banerjee, Sanchayan, Matteo M. Galizzi, and Rafael Hortala-Vallve. "Trusting the trust game: An external validity analysis with a UK representative sample." Games 12.3 (2021): 66，依篇文話搵到啲證據，發現信賴博弈當中嘅 T 值，真係同其他量度信賴嘅架生度到嘅嘢有統計相關。