生查子

生查子（有兩種讀法，「星茶子」粵音：sing¹ caa⁴ zi²；「生楂子」粵音：saang¹ zaa¹ zi²）係一個詞牌，又有名叫遇仙槎、美少年、楚雲深、梅和柳、晴色入青山，雙調共四十字，八句，望起身似兩首五言絕句拼埋噉，押仄聲，上聲去聲通押。原先係唐教坊曲，詞牌相傳係北宋歐陽脩所創。呢隻詞牌大多寫少年離愁，抒發怨抑、相思嘅情緒。

詞牌嘅來由及典故

據聞《生查子》係歐陽脩所創，係佢喺元宵望住啲人熱鬧憶起錯失咗嘅佳人，於是用教坊曲調寫低咗《生查子·元夕》。自呢首起，爲詞牌定咗字數、平仄、內容基調，所以寫嘅嘢多係少年離愁、暗恨相思。

就正名「生查子」而言，就有兩個讀法，分別源於關於呢個詞牌名嘅兩個解釋。

星槎（遇仙槎）之說

《博物誌》有個講法，大江河、大海洋會同天河交接，啲島民每年八月會見到有神秘嘅木筏來往，如果坐得上去，漂流返幾日，就會去到仙山瓊閣，見到牛郎織女。

南北朝編寫嘅《荊楚歲時記》就講咗噉嘅故仔，話漢武帝嘅使者張騫（騫讀牽，粵音：zoeng¹ hin¹）出使西域時好留心諸國嘅地理氣候、風土人情，到咗大夏國聽到話有條河溯流而上就會去到大江大河嘅源頭，於是自己坐木筏去，行行下水面越來越闊，好大霧，啲霧散咗剌，見到一邊有個女嘅織布，一邊有個男嘅牽牛飲水，原來佢去咗天河。返來時重帶咗織女嘅「支機石」。

呢類傳說重好多，一概叫做「海客乘槎」，「槎」嘅本意係水上浮木，後來指船。既然去得到天上，古人就認為槎係由啲星化成嘅，所以叫做「星槎」。

呢啲故仔一直作為奇聞異事以民歌流傳，有啲民歌單純唱尋仙遊記，有啲歌詠牛郎織女。南北朝時，因為讀音字形相似，「星槎」時時通假成「生槎」，又因為「槎」字生僻，乾脆寫成「生楂」「生查」，流傳到唐代，民歌「生查子」變成教坊曲，失卻咗尋仙嘅歌詞內容。因為係啲人寫字減咗筆，所以讀音以減筆前嘅「星槎」爲準。同時據呢個典故，呢個詞牌又叫「遇仙槎」。

山楂之說

康熙時編寫嘅《歷代詩餘》對「生查子」詞牌來源嘅講法就無咁多傳說：「查本楂梨之楂。」意思即係，查即係山楂，同梨夾埋整成「楂梨」。按佢講法，呢個詞牌源自叫賣唱詞。

所謂楂梨，係因為山楂消食化積，梨止咳潤肺，舊時啲人將山楂同梨洗咗後，去皮去核，一齊整碎落鑊文火煮，落埋蜜糖，等佢凝固成膠噉，就係酸甜潤喉嘅小食「查梨條」，又叫「楂梨膏」。啲貨郎小販走街串巷、沿途叫賣，爲楂梨唱咗套詞。

比如元雜劇《百花亭》就有小販王小二喺道唱楂梨膏食咗令人「調和臟腑」「補虛平胃」「止咳清脾」，重誇大講可以「成雙作對」「助起添歡」「諸災不犯」「百病都安」，因為小販嘅言詞面口，「賣查梨」呢個詞有刻意作笑擦鞋、輕薄唔識規矩嘅意味。

不過今日嘅校正嘅講法認為，「生查子」曲調初創時應該未有楂梨膏呢樣嘢食，認為清人嘅攷據唔妥，不過有可能係源自啲人摘、揀山楂時唱嘅民歌，不過呢點不可攷。所以據呢個講法，呢個詞牌嘅意思係「生嘅山楂子」，讀法唔同星槎嗰個講法。

其他名嘅來源

北宋詞人晏幾道掛住條女，茶飯不思，寫咗首《生查子》，因為得人稱道，開頭句中嘅「美少年」成為「生查子」嘅別名；朱希真寫過句「遙望楚雲深，人遠天涯近」，所以有名「楚雲深」；韓淲寫過首《生查子》，有句「山意入春晴，都是梅和柳」同埋「晴色入青山」，所以又有名「梅和柳」「晴色入青山」。

格式

註：平表示平聲，仄表示仄聲，仄表示本仄可平，平表示本平可仄，粗體表示韻腳。

正體

雙調四十字，上下闕各四句、兩仄韻，上去通押。

仄仄仄平平，仄仄平平仄。仄平仄仄平，仄仄平平仄。

仄仄仄平平，平仄平平仄。平仄仄平平，平平仄平仄。

例：

• 歐陽脩

去年元夜時，花市燈如晝。月上柳梢頭，人約黃昏後。

今年元夜時，月與燈依舊。不見去年人，淚滿春衫袖。

• 晏幾道

金鞍美少年，去躍青驄馬。牽繫玉樓人，繡被春寒夜。

消息未歸來，寒食梨花謝。無處說相思，背面鞦韆下。

變體

雙調四十字，前段四句、兩仄韻，後段四句、三仄韻。下闋第一句用韻，見於《樽前集》，而且得唐詞有變體。

平平平仄平，仄仄平平仄。仄仄仄平平，仄仄平平仄。

仄平平仄仄，仄仄平平仄。平仄仄平平，平仄平平仄。

例：

• 劉侍讀

深秋更漏長，滴盡銀台燭。獨步出幽閨，月晃波澄綠。

芰荷風乍觸，一對鴛鴦宿。虛掉玉釵驚，驚起還相續。

攷

• 清·王奕清 等.《欽定詞譜》. 中國書店. 2010年1月出版. ISBN 9787806637470.
• 詞語”海客乘槎“的解釋
• 詞牌名生查子的查字正確讀音