科學界
喺科學家方面，世界各地嘅大學同埋科研機構都會招收人做博士（PhD）學生，會喺博士課程度教佢哋點樣跟住頭先講咗嗰柞科學哲學同科學方法概念去追求新嘅知識；啲博士學生做到嘢、畢到業嘅話就有得成為科學家。响世界各地嘅大學、研究所或者係私營科研機構都會請科學家去搞科研。啲科學家做完研究之後會將自己嗰啲結果同攞到嘅數據用科研論文嘅形式發表，等其他同學科嘅科學家有得交流或者試吓將啲結果攞去重覆驗證。除咗科學家之外，科研人員亦都包括咗好多好似係研究助理呢類嘅人員－佢哋通常冇博士學位，但識少少有關科研嘅嘢，所以就打工喺實驗室或者大學度幫手執頭執尾[1]。
廿一世紀初嘅科學界係一個財力好雄厚嘅集團：全世界嘅政府都會幾億幾億噉揼錢落去自己區入面嘅大學嗰度搞科研；研究資金多嘅地區（好似係廿一世紀初嘅美國噉）多數會吸引到多啲有才華嘅科學家去做科研，亦都會出到多啲有影響力嘅研究[2]。