簡化字
呢篇文 需要補充更多來源。 |
呢篇文講中華人民共和國以《簡化字總表》為主嘅中文標準。想搵古代嘅簡筆俗字同埋其他簡化字標準嘅話，請睇簡體字。簡化字（粵拼：gaan2 faa3 zi6），又稱簡體中文、簡化中文，粵語又有簡筆字、簡體字、減筆字之稱，係1960年代中華人民共和國喺中國共產黨主導下所作嘅漢字簡化標準，而相對於傳統漢字（繁體中文）。
| 簡化字 | ||
|---|---|---|
| 類型： | 意音文字 | |
| 語言： | 漢語 | |
| 使用時期： | 20世紀60年代到而家 | |
| 母書寫系統： | 中文字 甲骨文 金文 篆書 隸書 傳統字 簡化字 | |
| 姊妹書寫系統： | 日本新字體 | |
| ISO 15924 碼： | Hans | |
| ||
由於當時中國文盲較多，1956年《漢字簡化方案》發表，幾年研究之後，1964年發表《簡化字總表》。之後字表雖然有啲變動，但基本沿襲呢份《總表》，喺中國大陸、星加坡、馬來西亞成爲簡化字嘅官方標準。
喺《總表》入面總共收咗2274隻簡化字同14個簡化偏旁，分4部分：第一表收350字，係唔做得簡化偏旁嘅簡化字；第二表收132字同埋14個簡化偏旁，係做得簡化偏旁嘅簡化字；第三表係參照第二表整出來嘅類推簡化字，收1753字；最後係附錄，收錄從《第一批異體字整理表》中慣常視作簡化字嘅規範字，有39隻。
1971年，中華人民共和國取代咗中華民國喺聯合國嘅席位。自此，簡體代替繁體成為聯合國嘅官方文書之一。踏入21世紀，隨住中華人民共和國影響力日增，外國人學中文時用嘅字逐漸變成以簡體為主。
而家一般將簡化字嗌做簡體字，其實正稱係「簡化字」，「簡化字」呢個名專指呢套官方標準，而簡體字有時可以指過去民間沿用嘅簡筆俗字，而家則又可以指「簡化字」。一般人講嘢無呢種區分，意識唔到呢啲名之間有唔同嘅學術定義。既然「簡化字」出咗來，中華人民共和國就將原先嘅傳統漢字嗌做繁體字，而中華民國方面則將自己定嘅漢字標準嗌正體字，同簡化字相對。
| 簡化 | 傳統 | 簡化 | 傳統 |
|---|---|---|---|
| 户 | 戶 | 见 | 見 |
| 讠 | 訁 | 贝 | 貝 |
| 车 | 車 | 钅 | 釒 |
| 长 | 長 | 门 | 門 |
| 青 | 靑 | 韦 | 韋 |
| 页 | 頁 | 风 | 風 |
| 飞 | 飛 | 饣 | 飠 |
| 马 | 馬 | 鱼 | 魚 |
| 鸟 | 鳥 | 麦 | 麥 |
| 黄 | 黃 | 齐 | 齊 |
| 齿 | 齒 | 龙 | 龍 |
| 龟 | 龜 | 丰 | 豐 |
簡化字、簡體字、簡筆字之別
編輯- 簡化字：公佈於中華人民共和國1964年，以1986年修訂嘅《簡化字總表》為準，係中華人民共和國官方之稱，對應住未簡化嘅「繁體字」。
- 簡體中文：以呢份《總表》做官方標準嘅中文書寫、印刷系統。
- 簡筆字：指史上古已有之、歷代通行嘅筆簡俗字，以「簡筆嘅異體字」爲準，有別於簡化字中嘅類推同整理。譬如，「体」字古為「體」嘅俗字。《小學》嗌做「省文」，日本嗰邊嗌做「略字」。
- 簡體字：有廣義、狹義之分；廣義上相當於簡筆字（民間俗字），狹義上指官方標準嘅簡化字。
爭議
編輯支持
編輯簡化字筆劃比傳統字簡單，將簡化字正式定為標準，原意係為咗短期內提升中國大陸識字率，有利書寫同推廣中文。等細路仔都無需嘥記憶力喺筆繁嘅字度，加快學童嘅學習進度。[未記出處或冇根據]
批評
編輯2015年，喺中國大陸新浪網一項網上調查，77%人反對漢字繼續簡化，58.8%人鍾意繁體字[1]。有人將簡化字叫做「殘體字」[2]，批評簡化字殘缺不全。
中國兩會有時會出現同繁簡文字有關嘅討論，有人提倡恢復繁體字教育[3]。
因簡化而合併嘅字，有時會造成混亂，增加負擔。一啲字簡化後變得字形相近，一啲變成一字多意。好多電腦軟件用機械翻譯將簡體轉繁體就成日搞到出錯[4]，因為有啲簡化字一個字對應幾個傳統字。
睇埋
編輯參考
編輯- ↑ 〈漢字仍有簡化空間？ 77%中國網友不支持 - 國際 - 自由時報電子報〉。喺2018-07-08搵到。
- ↑ 〈籲到圖書館自發下架「殘體字」書 熱血公民鄭錦滿被捕 - 香港經濟日報 - TOPick - 新聞 - 社會〉。topick.hket.com。喺2018-07-08搵到。
- ↑ 〈為什麼應該推行繁體字教育？--中國人大新聞--人民網〉。npc.people.com.cn。原著喺2020-03-28歸檔。喺2018-07-08搵到。
- ↑ 〈子貓物語~~附庸風雅: 令人髮指的簡繁轉換錯誤〉。《子貓物語~~附庸風雅》。2007-08-08。喺2018-07-08搵到。