維基百科

語用學

一個研究語言表達同使用佢哋嘅用戶同上下文之間關係嘅領域。
(由語用跳轉過嚟)

語用學（粵音：jyu5 jung6 hok6；英文：Pragmatics；德文：Pragmatik）係語言學嘅分支，主要係研究語境點樣影響語言單位（字詞同語句）嘅意思。語用學同語義學有啲似，都在意研究語言所表達嘅意思，不過語用學就零舍關注呢啲語言單位點樣表達言外之意，尤其係強調語境對意思嘅詮釋有咩影響。

語用學好重要，噉係因為一個人要有效使用語言，就一定要判斷話語當中有咩言外之意，尤其係要判斷對方有乜嘢意圖。舉個例說明，想像以下對話：

阿明：（路過）唔好意思，你有冇手機或者手錶等嘅嘢可以睇時間？
阿偉：我有手機呀，部手機仲好靚好多功能添。（然後佢就忽略阿明，繼續向前行。）
阿明：...

阿偉講嘅粵語語句，啱文法而且又正確表達到佢想表達嘅意思，但佢並冇理解到阿明之所以開口問，係因為佢想睇時間（意圖）但又冇手錶或者手機——阿偉冇理解到嘅呢個意思，阿明並冇明文講出嚟，屬於言外之意。

除咗滿足語言學家嘅好奇心之外，語用學研究亦都有實用價值。例如自閉症譜系障礙（包括亞氏保加症）相關嘅研究就有用到語用學概念。

領域定位

編輯
 
「係，係，你好勁。你好叻仔。」
呢個人係咪真係讚緊對方？
内文：言外之意同語義學
睇埋：語言學同社會語言學

語用學係語言學下嘅一個領域。根據二〇二四年《不列顛百科全書》嘅定義[1]，語用學研究語言嘅「實際應用」——語用學唔似得語義學噉，好多時淨係思考語言單位（字詞同語句等）嘅字面意思或者聯想意思，而係會考慮埋語言點樣喺語境當中起到溝通嘅作用，以及呢啲環境因素對「意思應該點樣詮釋」起到乜嘢影響。舉例說明，以下嘅話段[2] [註 1]：

「好凍喎。」

按語義睇，上述呢句嘢好可能會就噉當係一句描述世界狀態嘅命題。但喺實際應用上，句嘢好多時都唔係用嚟描述世界狀態咁簡單，而係用嚟叫聽說話嘅人（例如）將冷氣機校細啲，甚至乎有可能係有人邀請去食飯，講出「出面好凍，我唔想出街」噉嘅說話嚟婉轉拒絕。又例如以下呢啲對話，都具有一啲驟眼睇冇嘅意思：

例 1：
場景：一家人喺度食晚飯。
「支豉油就喺你手邊呀。」（可能係要求對方遞支豉油過嚟）
例 2：
「嗰間餐廳啲嘢好唔好食？」
「嗰間餐廳... 啲裝修幾靚嘅。」（好可能係間餐廳嘅食物唔好味，就轉移話題讚佢裝修）

由此可見，使用語言嘅人一定要睇講嘢方嘅表情、講嘢方同聽嘢方之間係咩關係、佢哋之前講咗乜嘢... 等等嘅大量因素，先至可以明白話段嘅言外之意[3] ——言外之意即係指「話段嘅字面意思冇包含，但聽說話嘅人 get1 到」嘅意思[4]。而考慮呢啲環境因素點樣左右話段包括嘅言外之意，就係語用學研究嘅重心。

廿一世紀初嘅語用學分析，最主要有兩套理論框架，講人類溝通嘅意圖[5][6]：言語行為理論同埋協調原則。

言語行為

編輯
内文：言語行為理論
睇埋：溝通同心靈理論

我哋要搞清楚，一串話段表達嘅意思同埋串話段『用嚟做乜』（股力）係兩樣嘢。任何種類嘅話段都可以視為行動。[7]

喺言語行為理論下，人類使用語言（講嘢或者寫嘢）同郁手打開道門或者郁手煮飯一樣都係屬於行動，人做親呢啲行動都一定係為咗達到某啲目的而做嘅。

言語行為理論最基本嗰個概念係言語行為[8]，講緊人使用語言，唔淨只係提供資訊咁簡單，仲係「一種行動」，例如粵語語句「支豉油喺你手邊呀，遞過嚟畀我」唔只係描述緊世界嘅狀態，仲係一個行動，想引起聽者出現心理狀態變化（知道講嘢嗰方想要乜）從而做出講嘢方想要嘅行為[9]。

三大層次

編輯

約翰·奧斯丁[10]同約翰·尚魯[11]呢兩位學者被視為語用學先驅。尚魯提出咗三大種語言行為去描述唔同層次嘅語言使用，分別係[12] [註 1]：

  1. 言內行為：講說話嘅人語有倫次噉表達資訊，產生特定嘅「詞義同埋參照體」[註 2] [13]:p 2，包括一段話段字面解係咩意思，以及係段語言嘅音素、字詞同句法特性；例如阿明開口問「你有冇手機或者手錶等嘅嘢可以睇時間？」佢嘅言內行為就係講出句說話嘅舉動，包括佢個腦產生發音、跟文法組合字句... 嘅過程。
  2. 言外行為[13][14]：講說話嘅人做出言內行為，言內行為暗示嘅意欲或者要求[註 3]就係所謂嘅言外行為；例如阿明開口問「你有冇手機或者手錶等嘅嘢可以睇時間？」講出句說話係佢嘅言內行為，而佢嘅言外行為就係做出唔該畀我睇時間呢個請求。順帶一提，如果言內行為同言外行為吻合，是次言語行為就算係一段直接言語行為，否則就算係一段間接言語行為[15]。間接言語行為嘅例子：
    「你可唔可以同我去飲杯咖啡？」「我要上堂。」喺語義上，回答方講嘅內容並冇直接噉反映我唔想去。
  3. 言後行為：講緊聽者對講嘢嗰方嘅話段（包括言內同言外行為）畀嘅反應，例如阿明開口問「你有冇手機或者手錶等嘅嘢可以睇時間？」然後對方攞部手機出嚟畀佢睇時間，對方做出嘅行為就係阿明嘅話段引起嘅言後行為。

言外行為

編輯
内文：言外行為

尚魯仲有做進一步嘅分析，提出言外行為可以細分做好多種[14]。佢講到嘅類型包括[16][17]：

  • 描述：講者描述世界嘅某啲狀態係點，信心程度可變，講者可以係好信誓旦旦噉話「呢樣嘢一定真確」，描述型嘅話段一係真確一係錯誤，可能例句有
    「我喺八月十五號賣出間屋。」「一個三角形內部嘅角度加埋係 180 度咁多。」「我啲學生不溜都要做功課嘅。（如果係向上司匯報）」
  • 指令：要求聽者做某啲行動[註 4]，句嘢可以有真確同錯誤之分，可能例句有
    「洗咗啲衫佢！」「食少啲肥膩嘢啦。」「我啲學生不溜都要做功課嘅。（如果係向住啲學生講）」
  • 承諾：講者承諾會喺將來做某啲行動，句嘢可以有真確同錯誤之分[18]，可能例句有
    「我一定會喺未來兩年內讀好呢個 degree。」「如果你唔還錢... 我哋會磨定把刀。（言下之意：對方唔還錢，就要攞刀斬對方）」
  • 表情：講者表達自己嘅情緒或者態度[註 5]，可能例句有
    「我頂！」
  • 宣告：透過宣告嚟改變現實，例如洗禮或者宣判某人有罪呀噉，可能例句有
    「我在此宣佈，XX 同 YY 正式成為合法夫妻。（如果由神父講）」

... 等等。而其他學者亦有提出唔同嘅分類法。

一個人要有效噉運用語言，必定要理解言語行為。事實係有研究指，啲人用親語言，多數都係重視言外行為多過言內行為嘅，所以一個人唔識得睇其他人嘅言外行為，會嚴重影響佢同其他人溝通。喺廿一世紀初有學者做研究指出，有自閉症譜系障礙（包括亞氏保加症）嘅人喺呢啲語用功能上出現咗異常，好多時都唔識理解其他人嘅言外行為[19]。

協調原則

編輯
内文：協調原則

協調原則[20]係由英國哲學家保羅·格賴斯[21]諗出嚟嘅一條原則，條原則就係講緊[22][23]:p 45 [24]：

人類講出話段嘅時候，傾向會互相『合作』（或者互相協調）[註 6]，即係話佢哋喺對話中會喺適當嘅時機作出貢獻，而且會跟從大家溝通嘅目的同方向。

協調原則仲包括四條「子原則」[註 7]，而一旦有人明顯違反協調原則[25]當中是但一條，通常就表示佢講嘅說話帶有言外之意。具體啲講[26][27] [註 1]：

質真準則

編輯

質真準則：一個人喺對話裡便肯合作，佢會講佢相信係真確嘅內容，而且一定係證據有返咁上下充分嘅佢先會講。如果佢刻意講任何嘅大話，或者明知自己冇足夠證據都提出一句主張，都係違反咗質真準則。

假如有個人講出：

  • 「我叔公住喺太陽表面。」噉嘅說話，佢應該係講緊大話[註 8]，違反咗質真準則。
  • 「我頭先笑到飛咗上天。」如果有個人聽咗個佢好受落嘅笑話，然後講出呢句嘢，佢違反質真準則，句嘢有非字面意思，用誇張手法加強語氣。

適量準則

編輯

適量準則：一個人喺對話裡便肯合作，佢講嘅內容資訊量會啱啱好，夠用就得，唔會太多亦唔會太少[註 9]。假想依家有兩個人阿明同阿珍，阿珍問阿明住邊，

  • 如果阿明答：「我住喺太陽系裡便。」，佢違反咗適量準則，因為佢講嘅嘢資訊量少得滯。
  • 如果阿明答：「我住九龍灣。其實我以前住大圍嘅，不過五年前搬過嚟九龍灣。我而家住嘅係屋苑，屋苑由九龍灣地鐵站行十分鐘就到，隔離有個商場，平時買嘢好方便。我住中座，總共三十層，我住十八樓。個單位係我表哥介紹俾我，佢話呢度嘅樓價升值潛力好大。我個單位兩房一廳，冇咩裝修，但係廁所兩年前整過，廚房就仲係舊嘅。我屋企右邊隔離屋養咗隻貓貓，時不時會走入嚟我屋企玩... （下略三百字）」佢都係違反咗適量準則，因為佢講嘅嘢資訊量大得滯。

跟住想像以下嘅對話

阿明：「你可唔可以借五千文畀我使？」
阿偉：「吓？我最近交咗租，交咗學費，仲要養我父母，又要還按揭...」（過分詳述財務狀況，非字面含意可能係想委婉拒絕借錢，但由始至終佢都冇開口講唔得）

挐掕準則

編輯

挐掕準則：一個人喺對話裡便肯合作，佢講嘅內容要同大家傾緊嘅話題相關，唔好講埋晒啲冇挐掕嘅嘢，例如

  • 「而家幾點鐘？」「我鍾意食壽司。」答嗰個講埋晒啲唔啦更嘅內容，違反咗挐掕準則。
  • 「你尋晚同邊個食飯？」「琴日天氣好，我去咗公園影相，啲花仲好靚！」回答方又係講埋晒啲唔啦更嘅內容，違反挐掕準則。

對方問自己去同邊個食飯，自己就講一大堆冇關係嘅內容，明顯違反挐掕準則。一個可能性係佢喺度轉移話題，唔想講自己去咗見咩人（非字面含意）。

方式準則

編輯

方式準則：合作嘅人，表達要清晰，要避免含糊，而且講嘢要有條理，例如

  • 「你覺得我今日表現點？」「嗯... 如果從某啲角度講，可以話係值得商榷。就好似話，如果我哋將『表現』呢個詞擺喺一個更寬闊嘅語境，其實你嘅所作所為都可以有唔同嘅詮釋...」回答方刻意講得好含糊，言之無物。
  • 「你今次測驗成績點？」「我可以話係又可以話唔係，要睇下你點樣理解『做成』呢兩個字嘅意思先。」回答方又係答得好含糊，講嘢冇咩實質內容。

回答者特登畀含糊答案，好多時都係喺度迴避問題，暗示自己衰咗（例如測驗唔合格），但又唔想直接認（非字面含意）。

語境設立

編輯
内文：語境

直指

編輯
内文：直指

前設

編輯
内文：前設

睇埋

編輯
  • 社會現實：有學者主張，言語行為理論同協調原則講嘅嘢，表示語用分析必然要諗埋社會現實或者類似嘅概念[28]；簡化講，社會現實包含一個社會入便「大家都認同係應該跟從」嘅規則，用同一種語言嘅人會（例如）對幾多資訊先算啱啱好（適量準則）有某啲默認嘅標準[註 7]。
  • 語言相對論
  • 語言習得
  • 句尾助詞
  • 修辭手法

文獻

編輯

英文文獻：

  • Ide, S. (2005). How and why honorifics can signify dignity and elegance (PDF). Broadening the horizon of linguistic politeness，呢篇文講敬語嘅使用，用嘅係歐美語用學觀點。
  • Levinson, S. C. (2016). The Interaction Engine hypothesis. Talk presented at the Language in Interaction Summerschool on Human Language: From Genes and Brains to Behavior. Berg en Dal, The Netherlands. 2016-07-03 - 2016-07-14，呢度有提到所謂嘅互動機器假說[29]，講緊人類天生就有本能識得同其他人互動，而呢種所謂嘅「互動機制」令人類有能力學用語言溝通。佢哋仲指出 BB 仔識講嘢之前就已經識用各種嘅非語言方法同身邊嘅大人溝通，算係為呢個假說提供咗證據。
  • Pijnacker, J., Hagoort, P., Buitelaar, J., Teunisse, J. P., & Geurts, B. (2009). Pragmatic inferences in high-functioning adults with autism and Asperger syndrome. Journal of autism and developmental disorders, 39, 607-618，呢篇文有提到遵守協調原則要求一個人識得理解其他人諗乜，而有自閉症譜系障礙嘅人正正就係呢種功能出咗問題。
  • Shevchenko, I., Matiukhina, Y., & Drazdauskienė, M. L. (2021). The evolution of the English small talk: a cognitive-pragmatic analysis. Cognition, communication, discourse, (23), 87-98，講到用認知科學同語用學嚟分析英文嘅使用者點樣傾閒偈。

註釋

編輯
  1. ↑ 1.0 1.1 1.2 譯名見：LSHK 雙語術語對照表
  2. ↑ 取自奧斯丁講嘅 "sense and reference"；有關參照體係乜，可以睇睇語義三角嘅概念。
  3. ↑ 唔包啲字句嘅文法或者發音特性。
  4. ↑ 可以睇吓祈使句嘅概念。
  5. ↑ 可以睇吓感嘆句嘅概念。
  6. ↑ 格賴斯同其他協調原則嘅相關學者講「合作」，同日常生活入便講嘅合作有些少唔同。
  7. ↑ 7.0 7.1 呢點可能唔同文化都唔同。
  8. ↑ 以廿一世紀初嘅科學知識睇
  9. ↑ 有關資訊量要點計，可以睇吓資訊理論同資訊熵嘅概念。

引述

編輯
  1. ↑ pragmatics. Encyclopedia Britannica.
  2. ↑ 話段：utterance
  3. ↑ 言外之意：implicature
  4. ↑ Davis, Wayne (2019). "Implicature". In Zalta, Edward N. (ed.). The Stanford Encyclopedia of Philosophy. Metaphysics Research Lab, Stanford University.
  5. ↑ Miller, A. (1998). Philosophy of Language. London: UCL Press. p.223
  6. ↑ Strawson, P.F. (1971). 'Meaning and truth'. In Strawson, P.F. (ed.) Logico-linguistic papers. London: Methuen.
  7. ↑ Sbisà, Marina. 1995. Speech act theory. In: Jef Verschueren, Jan-Ola Östman and Jan Blommaert (eds.), Handbook of Pragmatics – Manual, 495-506. Amsterdam: John Benjamins. p 496 "that 'a distinction has to be drawn between the meaning expressed by an utterance and the way in which the utterance is used (i.e. its 'force') and ... that utterances of every kind ... can be considered as acts."
  8. ↑ 言語行為：speech act
  9. ↑ Austin, J. L. (1975). Urmson, J. O.; Sbisà, Marina. (eds.). How to do things with words (2nd ed.). Cambridge, Mass.: Harvard University Press.
  10. ↑ 約翰·朗肖·奧斯丁：John Langshaw Austin
  11. ↑ 約翰·尚魯：John Searle
  12. ↑ 言內行為：locutionary act；
    言外行為：illocutionary act
    言後行為：perlocutionary act
    嚟自拉丁文 locutionem，大致即係拉丁文講嘢嘅方式或者言辭噉解。參見英文詞源學辭典。
  13. ↑ 13.0 13.1 Searle, J. R. (1968). Austin on locutionary and illocutionary acts (PDF). The philosophical review, 77(4), 405-424.
  14. ↑ 14.0 14.1 Searle, J. R. (1975). A taxonomy of illocutionary acts. Available on University digital conservancy.
  15. ↑ 直接言語行為：direct speech act；間接言語行為：indirect speech act
  16. ↑ 描述：assertive / representative；
    指令：directive；
    承諾：commissive
    表情：expressive
    宣告：declaration
  17. ↑ UC San Diego, Written Asssignment - Illocutionary Classification，啲例句部份係嚟自呢度嘅。
  18. ↑ Senft, G. (2014). Understanding pragmatics. Routledge. 1.3.2 (p. 21) Sincere promising and its propositional content conditions，有講到承諾呢種言語行為係幾咁複雜。
  19. ↑ Lam, Y. G. (2014). Pragmatic language in autism: An overview. Comprehensive guide to autism, 533-550.
  20. ↑ 協調原則：the cooperative principle，CP；又有叫格賴斯派嘅原則，the Gricean principle
  21. ↑ 保羅·格賴斯：Paul Grice
  22. ↑ Grice, H. P. 1989. Studies in the way of words. Cambridge, MA: Harvard Univ. Press.
  23. ↑ Grice, H.P. (1975). 'Logic and conversation' In Cole, P. & Morgan, J. (eds.) Syntax and Semantics, Volume 3. New York: Academic Press. pp. 41-58.
  24. ↑ Horn, L. Cooperative Principle. Oxford Bibliography.
  25. ↑ 呢樣嘢喺英文裡便有個名，叫 flouting the maxim。
  26. ↑ Davies, B. (2000). Grice's cooperative principle: Getting the meaning across (PDF). Leeds Working Papers in Linguistics and Phonetics, 8(1), 26.
  27. ↑ 質真準則：the maxim of quality
    適量準則：the maxim of quantity
    挐掕準則：the maxim of relation
    方式準則：the maxim of manner
  28. ↑ Senft, G. (2014). Understanding pragmatics. Routledge. 1.4
  29. ↑ 互動機器假說：The Interaction Engine hypothesis

外拎

編輯
 
維基同享有多媒體嘅嘢：
語用學
由「https://zh-yue.wikipedia.org/w/index.php?title=語用學&oldid=2204704」收
  NODES