金屬
喺化學入面，金屬係一啲隨時會釋放電子，成為離子，而喺元素形態時又以金屬鍵鍵形式存在嘅化學物質。佢哋有時會被形容為一堆畀電子圍住嚟轉，成為結晶體嘅正離子。金屬亦係元素三大分類之一，同半金屬與及非金屬並列。硼（B）至到釙（Po）嘅一條對角綫將元素週期表分成兩部分，左下角係金屬，右上角係非金屬，疊住條綫嘅就係半金屬。
大自然裏面非金屬嘅分量多過金屬嘅分量，但係金屬就佔咗元素嘅大部分。常用嘅金屬，例如五金，即係金、銀、銅、鐵、錫，都係元素。
金屬元素嘅所有同素異形體（Allotrope）個樣都閃令令、可延展嘅（Malleability）、可延長嘅（Ductility），全部都係導電體（Conductor of electricity），同埋好嘅導熱體。相比起來講，大部分非金屬元素都好脆 （Brittle），又係啞面，而且唔傳電。金屬傳電係因為佢最面頭嗰個電子殼啲電子都唔係好穩定，鍾意甩出去，所以就出晒去原子同原子之間嘅空隙，形成一個類似「電子海」嘅游離電子層。
大部分金屬都係唔穩定嘅化學物質。當佢哋係金屬，即係重係以元素形式存在嘅時候，會同氧氣產生唔同速度嘅化學作用。快嘅好似鉀同氧氣嘅反應會喺幾秒之內完成，但係鐵同氧氣嘅反應，即係生銹，就要幾個月甚至幾年先至完成，途中重要經過幾個階段。鹼金屬反應最快，其次係鹼土金屬，過渡元素會慢啲，當中例如金、銀、鉑就直情唔會有化學反應。
有啲金屬會自然形成一浸好薄，但係好硬，而且唔透水嘅氧化層，例如鋁、鈦。呢浸氧化層將個金屬物件同外界完全隔絕，成為一個保護層。所以呢啲金屬雖然好易產生化學作用，但係都算係一啲抗侵蝕嘅金屬。呢層天然嘅氧化層比大部分嘅人工保護層防禦力更強，而且可以用陽極電鍍 （Anodizing）嘅方法加厚。