錫克教
錫克教（英文：Sikhism）係喺十六世紀印度西北部旁遮普地區，一個叫納那克祖師嘅人始創嘅一個宗教。最初錫克教係為咗調和印度教同伊斯蘭教嘅衝突而產生出嚟，試圖以和平、溫和嘅方式建立一個超越教派嘅統一宗教。但後來由於錫克教出咗個叫「卡爾沙」嘅軍事教團，令錫克教變成一個崇武嘅宗教。
錫克教係一個一神論宗教，祖師納那克認為，神係宇宙唯一創造者、全能全知、公正仁慈，而且係唯一、永恆，至於其他唔同宗教所敬拜嘅神，只係同一個神有唔同嘅稱呼咁解。錫克教反對偶像崇拜同儀式，所以錫克廟入面唔會有任何神像，只有一本《阿底格蘭特》。《阿底格蘭特》係錫克教嘅聖典。
錫克教有套祖師制度；佢哋認為祖師係神嘅使者，人一定要喺祖師指導之下修行，先可以解脫。錫克教徒鍾意一齊食飯，呢個習慣來自佢哋集體就餐制度。錫克教 5K 制規定唔畀剪頭髮或者鬍鬚，所以一世人都唔會飛髮，留到頭髮長一長，出街時捲埋一個蛇餅，然後用布包實，即係廣東話叫嘅「包頭」。
教名
編輯「錫克」係梵文 Sikha 同旁遮普文 Siikh 音譯，意思係門徒，即係話信錫克教嘅人都係祖師嘅門徒。另一個解譯話「錫克」係旁遮普文 Sikhna，即係解學習，即係話錫克教教徒都係一生學習同追隨咁解。
簡史
編輯錫克教係15世紀響印度教巴克提派嘅虔信運動（梵天信仰）同伊斯蘭教蘇菲派嘅共同基礎上產生。1469年由第一代祖師拿那克（Nanak）創始。聖地響旁遮普邦阿姆利則市，呢度有錫克教最大寺廟——大金廟。「錫克」響梵文嘅原意係「門徒」咁解，因呢個教嘅教徒自稱祖師嘅門徒。
早期實行祖師制，響第十代祖師後被廢除。十八世紀初分成易行派同獅子派兩個派。錫克教強調人人平等，男人之間都係兄弟，女人之間都係姐妹。佢哋奉行嚴格嘅一神論，同埋會禮拜幾代祖師。
響莫臥兒帝國統治時期，教徒多次掀起發對專制主同莫臥兒國家嘅鬥爭。響英國統治時期，曾經多次展開反英鬥爭。1947年印巴分治之後，印度信仰呢個教嘅錫克人掀起咗伽里斯坦運動（Khalistan）。
1980年代錫克教民兵拒絕解除武裝，逐漸發展做地方軍閥，變成「國中國」，印度政府唔妥佢哋，就發動咗藍星行動，解除咗錫克民兵嘅武裝。
十位祖師
編輯
錫克教發展過程之中，總共出過十位祖師，第一個祖師叫納那克，佢亦係錫克教創教人。
納那克
編輯納那克戴夫（Nanak Dev）係錫克教創教人，關於納那克歷史上無乜記載。根據錫克教相傳，納那克喺1469年4月15號喺旁遮普塔爾萬提村一個印度教家庭出世。有日佢喺條河度沖沖吓涼唔見咗，全村人博命搵都搵唔到佢，三日之後突然間出現返，之後一路唔講嘢，到開口講嘢時第一句說話就係：「無印度教徒，亦都無穆斯林」之後佢講返自己經歷，話沖沖吓涼突然送咗上天堂，天神畀咗杯甘露佢飲，話：「你飲咗之後，我就與你同在」最初啲人當佢痴線，但係佢嘅行為就激到好多穆斯林都好嬲。有日佢召咗入宮見土邦王，啱啱佢哋做緊禮拜，個個都跪低祈禱，係得納那克無跪，之後佢話：「真主無接受佢哋祈禱」然後慢慢解釋宗教儀式無用，土邦王聽完之後覺得好有道理，重話要將王位讓畀佢，但納那克無受到，之後個土邦王就成為納那克第一個弟子。
其他祖師
編輯納那克死咗之後，選咗安格德做指定承繼人，成為第二代祖師。1552年安格德又搵咗阿瑪爾做指定承繼人，成為第三代祖師，喺佢領導之下發展出錫克教集體就餐制度。1574年阿瑪爾死之前又將祖師傳咗畀拜傑特，佢做咗祖師之後，改名做拉姆，成為第四代祖師，佢做咗七年祖師，其間帶領信徒搵咗好多個甘露池，同時開咗好多傳教路線。
拉姆將祖師傳咗畀佢細仔阿爾瓊，成為第五代祖師，佢係第一個畀皇帝處死嘅祖師，佢死咗之後由佢個仔哈爾戈賓德接任成為第六代祖師，由於阿爾瓊嘅死令佢覺得錫克教唔可以再任人宰割，於是開始咗錫克教尚武時期，曾經殺死一隻老虎救返賈汗德皇帝一命，點知後尾畀賈汗德皇帝送咗去古城囚禁，放返之後周圍傳教，放咗好多時間去組織同訓練軍隊，最後佢喺深山過隱居生活。哈爾戈賓德將祖師傳咗畀佢個孫哈爾萊，成為第七代祖師。
之後哈爾萊將祖師傳咗畀佢個二仔哈爾克里森成為第八代祖師，當時佢只得五歲，佢最後因為天花而死，死嗰陣八歲，所以無兒無女，亦無指定承繼人，不過佢死之前拎住一個椰子同五個銀仔，根據呢啲線索，搵到泰格巴哈杜爾接任第九代祖師，期間旁遮普因為政府宗教政策，對伊斯蘭教以外嘅宗教壓迫，原本只係針對印度教，後來連錫克教都波及埋，泰格巴哈杜爾畀人捉去逼改信伊斯蘭教，但佢死都唔肯，結果畀人斬頭，成為第二個殉教嘅祖師。
泰格巴哈杜爾死咗之後，由佢九歲個仔戈德賓辛格接任成為第十代祖師，之後佢曾經領導錫克教軍隊，打贏過好多場仗，1699年佢頒布法令，成立一個叫「卡爾沙」嘅軍事教團，其間創立咗5K制度，不過佢一生花最多時間喺整理聖典，最後編咗成套《阿底格特》出嚟，宣佈祖師傳到佢就唔再傳，以後《阿底格蘭特》就係十世祖師象徵，最後佢喺1708年10月7號死。
十位祖師生卒年一覽
教義
編輯
錫克教最初係由印度教巴克提發展出嚟，創教祖師納那克又同時熟讀伊斯蘭教嘅《古籣經》，喺印度教基礎上，結合伊斯蘭教蘇菲派思想，最後變成自成一格嘅宗教。
錫克教基本教義簡單以三個觀念構成：「神、師尊、真名」，神即係指唯一嘅神，無論你信邊個教，其實都係同一個神。師尊即係指十大祖師，或者一本《阿底格特》代表晒。而真名就即係神嘅顯現形式。
另外有四條教規：
- 唔畀食煙同飲酒。
- 一夫一妻神聖婚姻
- 唔可以拜偶像
- 終身遵行5K，即係五件事：留長頭髮（Kesh）；戴髮梳（Kanga）；着短褲、長衫過膝（Kachhera）；佩短劍（kirpan）；戴鐵手鈪（kara）；呢五件事嘅第一個字母都係K字頭，所以叫5K，意思即係將道德、精神同軍事結合[1]。
重有其他禁忌：
- 唔可以殺生獻祭：娑提（寡婦響葬禮跳落火度同老公殉葬）同儀式性動物獻祭都係唔准嘅。
- 生活方式：錫克教徒唔可以做隱士、乞兒、瑜伽士、修行者（修士或者修女）又或者獨身者，應該要做聖戰士。
- 無聊話：吹水、講大話、誹謗同督背脊後中傷都係唔准嘅。Guru Granth Sahib 告誡錫克教徒[2]：「你把嘴如果係咁誹謗人同埋講人是非，你幾多付出都係冇用同冇好結果嘅。」
- 冇神權階層：錫克教唔會有教職人員，佢哋都畀 Guru Gobind Singh（錫克教第十位古魯）廢除咗[3]。唯一有得留低嘅職位係 Granthi，負責照顧 Guru Granth Sahib，任何錫克教徒都可以做 Granthi，接受 Guru Granth Sahib 嘅教誨[3]。
- 食用儀式殺死嘅動物啲肉：錫克教徒唔可以食通過宗教形式殺死嘅動物啲肉（叫做 Kutha 肉，動物割喉之後失血過多而死）[4]，或者唔清楚背景嘅肉[5]。錫克教徒所食用嘅肉稱為 Jhatka 肉[6][7]。
思想
編輯一神論
編輯錫克教只崇拜一個神，係個一神論宗教，佢哋理解嘅神有幾個特點：獨一無二、宇宙唯一創造者、全能全知、公正仁慈。創教祖師納那克認為，唔同宗教嘅人，大家拜嘅神，唔理你話係印度教個摩羅定伊斯蘭教個亞拉，其實都係同一個神。
業報輪迴
編輯錫克教出自印度教，所以亦有輪迴之說，即係話，今世做好事，下世會有好報，今世做壞事，下世會有惡報。一定要積德行善，下世先有機會修行成人。人有自由意志去決定做好事定壞事，但因為有摩耶阻住，所以睇唔到真理，無辦法認識神，摩耶即係「幻覺」噉解，只有通過祖師嘅教導，先可以突破呢啲幻覺，達到天人合一境界。
解脫
編輯錫克教同印度教一樣，以解脫作為終極信仰目的，錫克教認為，人生出嚟就係要受苦受難，然後喺痛苦之中解脫。
倫理
編輯錫克教提倡人人平等、勞動價值、非暴力，佢哋反對性別歧視同偶像崇拜，亦都反對麻麻煩煩嘅祭祀儀式。
錫克教鼓勵教徒投入社會生活，同時推崇勞動價值，認為不勞而獲等如寄生蟲。佢哋認為職業無貴賤之分，只要係自食其力，又肯同人分享成果，就係正確生活道路。佢哋容忍唔到一個人無所事事。
錫克教提倡一夫一妻制，雖然亦可以離婚，但唔鼓勵。女性地位同男性一樣，可以一齊讀經，又可以擔任宗教聖職。
聖典
編輯錫克教最重要嘅聖典係《阿底格蘭特》（Adi Granth），又或者叫做《格蘭特沙哈布》（Granth Sahib），阿底格蘭特意思係「原初經典」，由五世祖師阿爾瓊在位嗰陣開始編，最後由十世祖師戈德賓辛格完成。呢本嘢內容乜都有，主要係講錫克教教義，每一世祖師寫嘅讚歌，總共夾埋有3384 首讚歌，15575 詩節。
聖典主要係用旁遮普文寫成，但亦夾雜咗梵文、古吉拉特文、印地文、馬拉地文、波斯文。
由於錫克教反對形像崇拜，所以錫克教嘅寺入面無任何神像，只有本《阿底格蘭特》用嚟拜，由於第十世祖師戈德賓辛格取消咗祖師制，所以《阿底格蘭特》就變咗十世祖師象徵。
組織
編輯公社
編輯公社即係卡爾沙（Khalsa），意思即係純潔，指嘅係國土。卡爾沙由第十世祖師戈德賓辛格設立，之前錫克教以教區（Sangat）組織，即係每個區有一個教主，但後來啲教主慢慢權力越嚟越大，有啲重威脅到祖師嘅權威，於是戈德賓辛格就以卡爾沙取代教區制，跟住又定五種教規，叫做「5K制」。加入錫克教只要通過一個「劍禮儀式」，就會成為卡爾沙成員。
集體就餐
編輯集體就餐係錫克教一大特式，由第三世祖師阿瑪爾定出嚟，佢原意係打破印度傳統嘅種姓隔離制度而嚟，種姓隔離制度係將人分成唔同階層，然後每一種人都唔可以一齊。錫克教因為反對呢種制度，所以搞呢個集體就餐制，唔理乜嘢人，有乜嘢宗教背景，都走埋一齊食飯，三世祖師阿瑪爾重試過請到皇帝同平民一齊食飯。
而家嘅錫克教仍然會開好多公共餐廳，畀啲窮人入去同佢哋一齊食飯。
錫克人
編輯錫克教徒以印度旁遮普嘅旁遮普人為主，因為宗教而變成一個民族，叫錫克人。錫克人亦最多喺印度旁遮普地區，但亦有分佈喺全世界唔同地區。由於錫克教尚武嘅傳統，錫克人好多都鍾意入軍隊做軍人，印度軍隊入面佔大半都係錫克人，而喺分佈喺其他國家嘅錫克人，都係傾向於搵返類似嘅工作，例如軍隊或者保安之類。
錫克人認為身體係神嘅創造，所以唔會飛髮[8]，留到頭髮長一長，出街時捲埋一個蛇餅，然後用布包實，即係廣東話俗稱叫「包頭」，行出街一認就認到，同時亦留到滿面鬍鬚。錫克女人都鍾意着一種叫旁遮普服嘅傳統服裝。錫克人道德觀念同自律性都好強，平時都好有禮貌。
自從第十世祖師戈德賓辛格要求所有錫克人喺受洗後，都要加「辛格」（Singh）喺個名後面，意思係「獅子」，象徵虔誠、勇敢、犧牲精神。之後所有錫克人個名都有辛格。受洗女嘅姓「考爾」（Kaur），意思係「公主」。
香港同新加坡亦有好多錫克人，但因為多數人都唔識錫克人講嗰啲話，辛格個發音Singh同廣東話「星」同音，慢慢錫克人喺廣東話就有個俗稱叫「亞星」。
現代錫克教
編輯印度獨立之後，錫克人諗住旁遮普可以有一個獨立自治邦，有自己一個錫克教地區，點知當時尼魯赫政府大隻講唔算數，令錫克人開始產生民族主義思想，爭取一個自治邦成為錫克教宗教領袖嘅一個主要議題，由於太多參與政治鬥爭運動，所以喺教義同宗教理論上都無乜嘢搞過。1970年代旁遮普地區喺農業經濟發展上面快速成長，即所謂「綠色革命」，旁遮普生產高級糧品佔全印度幾乎一半，令旁遮普得到一個外號叫「印度糧倉」，由於經濟地位提高咗，自治嘅要求又成為議題，1973年通過「阿南德普爾決議」，將旁遮普語地區劃做一個「旁遮普邦」，但政府遲遲都唔肯落實，就算發動過好多遊行示威，政府都係用強硬手段拉人封艇。結果搞到部份錫克人開始激進，重開始出現以恐怖手段爭取獨立，暗殺、爆炸、搶劫等，令旁遮普治安變差，呢啲組織之中，以賓特蘭瓦爾嘅組織最大，呢班人主要匿喺金廟入面。之後印度政府發動「藍星行動」，衝入錫克教認為最神聖嘅金廟入面拉人，期間對金廟造成好多破壞，令鍚克教同印度教結怨，開始發生好多教派仇殺。
旁遮普問題到而家都仍然未解決，係印度政府一個辣手問題。
節日
編輯錫克教有自己獨特文化同節日，不過由於錫克教係由印度教演變出嚟，所以有啲節日都係喺印度教度嚟，同埋以印度曆計，例如燈節（即係新年）同灑紅節都係印度教節日。另外，祖師誕辰係錫克教最主要節日，其中以創教祖師納那克誕辰同第十世祖師戈德賓辛格誕辰最大件事。
寺廟
編輯寺廟係錫克教徒去敬拜嘅地方，傳統上錫克教徒要日日去上香禮拜，不過而家啲人因為要返工，所以只會放假先去，錫克教嘅寺廟通常都係白色同圓頂，門口掛住一支黃色嘅旗。
錫克教嘅寺廟有兩種，一種係畀教徒做宗教活動而起，另一種就類似聖地咁，呢類通常起喺祖師誕生或者殉難嘅地方，呢類都係屬於古蹟兼係錫克教聖地。
參考
編輯- ↑ 〈五K錫克教徒標準裝束〉。原著喺2009年2月28號歸檔。喺2007年10月12號搵到。
- ↑ Srigranth.org – Guru Granth Sahib Page 1253
- ↑ 3.0 3.1 The Sikhism Home Page: Introduction to Sikhism
- ↑ Sikhs and Sikhism, Dr. I.J.Singh, Manohar Publishers.ISBN 978-8173040580
- ↑ "Sikhism, A Complete Introduction" by Dr. H.S. Singha & Satwant Kaur Hemkunt, Hemkunt Press, New Delhi, 1994, ISBN 81-7010-245-6
- ↑ Jhatka 互聯網檔案館嘅歸檔，歸檔日期2010年9月10號，., The Sikh Encyclopedia
- ↑ What is Jhatka Meat and Why?
- ↑ "Why Sikhs do not cut their hair but they cut their nails?". 原著喺2007年9月27號歸檔. 喺2007年10月12號搵到.
出面網頁
編輯
|
維基辭典嘅字詞解釋 |
|
維基同享嘅媒體 |
|
維基新聞嘅新聞故事 |
|
維基語錄嘅名言 |
|
維基文庫嘅原始文獻 |
|
維基書本嘅教科書 |
|
維基學府嘅學習資源 |