雲南

  想搵日本島根縣一市嘅話，請睇雲南市。

中華人民共和國 > 雲南省

雲南省 云南省
簡稱：滇、雲 地名出處：雲嶺以南
國立西南聯大舊址
省城	昆明
最大城市	{{{最大城市}}}
省委書記	李紀恆
人大常委會主任	{{{人大常委會主任}}}
省長	陳豪
政協主席	{{{政協主席}}}
面積 - 總面積 - 佔全國	第8位 394,000 km2 4.11%
人口（2013） - 總人口 - 人口密度	第位 4686.6萬 人/km²（第位）
- 民族	漢族（67%） 彝族（11%） 白族（3.6%） 漢尼族（3.4%） 壯族（2.7%） 傣族（2.7%） 苗族（2.5%） 回族（1.5%） 藏族（0.3%） 德昂族（0.19%）
- 本地語言	西南官話
GDP（2014） - 總值 - 佔全國 - 人均GDP - HDI（2010）	第23位 12,814.59 億人民幣 2.18% 27368.970元人民幣（第29位） 0.609（第29位） ── 中
轄下 - 地級 - 縣級 - 鄉級	16 個 129 個 1565 個
ISO 3166-2	CN-53
時區	UTC+8
網站	http://www.yn.gov.cn/

雲南（粵拼：wan4 naam4），簡稱滇（滇讀田，tin4）或者雲（wan4），喺中國西南，家下係中華人民共和國雲南省，省城昆明。佢位於中國邊境，黐住緬甸、老撾同埋越南。

史

内文：雲南史

大唐之前

滇國嘅青銅雕塑

前3世紀，楚國大將莊嶠入滇池地區，建立滇國。前221年，秦始皇統一六國，喺雲南東北部設立郡縣，開埋五尺道自家下嘅曲靖聯繫內地。前109年，漢武帝派將軍郭昌入滇征服西南夷，設立益州郡同埋24個縣，郡治滇池縣（家下晉寧），開闢通去緬甸同埋印度嘅商道，又派唐蒙修復擴建五尺道，更名為西南夷道。漢朝征服西南夷時，發現當地有來自「身毒」嘅商人（今日巴基斯坦嘅信德省，梵語叫做「Sindhu」。三國時期，雲南地區叫做「南中」，225年，蜀國丞相諸葛亮率大軍降服「南中」大姓孟獲。320年代，爨cyun3氏入滇，爨琛喺昆川（家下晉寧）稱王，爨氏統治維持400年。

南詔國同埋大理國

大理崇聖寺三塔

唐朝時，738年，洱海地區嘅蒙舍詔部落首領皮羅閣兼併其他五詔，建立南詔國，被唐朝封為雲南王。跟住建都太和城（今大理市）。902年，南詔國權臣鄭買嗣奪位自立，改國號大長和。929年，趙善政滅大長和國，建立大天興，跟住東川節度使楊乾貞滅大天興國，改國號大義寧。937年，白族段思平滅大義寧，建立大理國，都城大理。疆域包括現時嘅雲南省，貴州省，四川省西南部，緬甸北部地區，以及老撾同埋越南嘅少數地區。

元明清時期

1253年，忽必烈派蒙古軍隊征服大理國，1276年正式建立雲南行省。色目人賽典赤任平章政事，省會中慶路（昆明）。喺雲南開發重要嘅銅礦同埋銀礦，產量佔全國一半以上。大批色目人及少量蒙古人移居雲南，形成今日嘅雲南回族同埋蒙古族。1381年，明朝洪武皇帝派大將傅友德、沐英率軍隊攻佔雲南，滅元朝梁王，漢族軍民開始大批移入雲南，從明初到明末，雲南人口由廿幾萬增加到140幾萬。隨住大批漢族人口移民雲南，令雲南嘅經濟同埋文化都有長足嘅進步。明朝末年，南明永曆皇帝逃亡到雲南。清朝初年，1659年，派平西王吳三桂追捕永曆。1662年吳三桂喺緬甸捉到永曆皇帝，喺昆明絞死。吳三桂駐守雲南。1856年－1873年，雲南迴民以大理為中心建立杜文秀穆斯林政權，幾乎佔領昆明城以外嘅雲南全境。戰後，雲南回族人口大量減少。晚清時期，英國征服緬甸，法國征服越南，兩國勢力對雲南產生一定影響。邊境地區開放咗幾處通商口岸：騰沖、蒙自、思茅。1910年，法國投資嘅滇越鐵路（中國境內部分家下叫昆河鐵路）通車。1909年，清朝實行新政，雲南編立新軍，成立陸軍講武堂。

民國

1911年10月30日（重陽節），蔡鍔、唐繼堯率新軍發動重九起義，脫離清朝。1915年12月25日，蔡鍔、唐繼堯又喺度發動反對袁世凱嘅護國運動。民國時期，滇軍喺雲南形成割據局面，先後有唐繼堯、龍雲（1928年－1945年）等統治雲南。

1938年抗日戰爭期間，付出極大代價嘅滇緬公路修通，成為中國同境外聯繫唯一嘅交通線。1942年有十幾萬中國遠征軍從雲南進入緬甸配合英軍同日軍作戰，日軍擊敗英軍，沿滇緬公路進至惠通橋，隔怒江同中國軍隊對峙兩年。1938年－1946年，清華大學、北京大學、南開大學喺昆明聯合辦學，叫做國立西南聯合大學。

共和國

1960年代三線建設（將工廠搬到京廣鐵路以西、長城以南、韶關以北內陸地區）時期，修通咗聯繫雲南同埋內地嘅鐵路，1966年貴昆鐵路通車，1970年成昆鐵路通車。

地理

雲南西北部迪慶藏族自治州嘅雪山

大理洱海

瀘沽湖

位置

雲南係中國最西南方嘅一個省，北回歸線穿過省境南部，全省面積394,000平方千米，佔全國4.1%。該省嘅東面係廣西壯族自治區同埋貴州省，北面係四川省，西北面係西藏自治區。雲南嘅國境線長4060千米，同3個國家接壤：西面係緬甸（主要口岸係瑞麗），南面係老撾，東南方係越南（主要口岸係河口-老街）。

地形

雲南省係一個以高原山地為主嘅省份，地形嘅類型極為多樣化，包括高原、山原、高山、中山、低山、丘陵、盆地、河谷等。其中山地大概佔84%，高原、丘陵大概佔10%，盆地、河谷大概佔6%。

雲南省嘅地勢同中國整體嘅地勢差唔多，西北高而東南低。全省最高峰係西北部迪慶藏族自治州德欽縣嘅梅里雪山，海拔6740米。最低點係河口縣嘅紅河河谷，海拔76.4米。

雲南嘅地形大體上可以以元江河谷為界，分為東西兩大部分：雲南省嘅東半部叫做雲南高原，係雲貴高原嘅一部分，平均海拔2000米左右，總體上地形呈波濤狀起伏，高原上廣泛呈現嘅係低山、丘陵景觀，喺小範圍內可以表現為起伏較為和緩嘅高原面，呢類地形相對平緩嘅地區大概佔全省總面積10%左右。雲南省嘅西半部係著名嘅橫斷山脈或稱滇西縱谷區，特徵係高山、峽谷相間。

雲南省嘅主要山脈，喺西半部有高黎貢山、怒山、雲嶺、哀牢山、無量山、梅里太子雪山、玉龍雪山、蒼山等。

水文

河流

雲南省嘅河流分屬於6大水系：伊洛瓦底江水系、薩爾溫江水系、湄公河水系、長江水系、紅河水系同埋珠江水系。佢哋都屬於亞洲嘅主要水系，分別匯入印度洋同埋太平洋，流經雲南省嘅部分多數屬於河流嘅上游河段。而且大部分河流嘅流向係由北向南，同中國大部分地區河流由西向東嘅流向唔同。

• 伊洛瓦底江喺雲南西部邊境地區有3條重要嘅支流，好似雲南西北角屬於怒江州貢山縣嘅獨龍江，同埋流經德宏州以及保山市騰沖縣嘅大盈江、龍川江。
• 薩爾溫江喺中國境內叫做怒江，發源於西藏唐古拉山南麓，喺雲南境內長547千米，其中流經高黎貢山同埋怒山之間怒江大峽谷嘅河段長達310千米，河谷深切，水流湍急，喺德宏州潞西市流入緬甸，最後注入印度洋嘅安達曼海。
• 湄公河喺中國境內叫做瀾滄江，發源於西藏唐古拉山北麓，喺雲南境內長1170千米，出境後流經緬甸、老撾、泰國、柬埔寨、越南5個國家，最後注入南海。
• 紅河喺中國境內叫做元江，發源於大理州南部嘅山區，喺紅河州河口縣流入越南，經河內注入北部灣。元江喺雲南境內全長692千米。
• 長江嘅上游從青海玉樹到四川宜賓叫做金沙江，流經雲南北部嘅河段長達1560千米。
• 珠江嘅正源南盤江發源於雲南省曲靖附近，向西南、南，再折向東，喺羅平縣進入廣西。南盤江流經雲南嘅河段長677千米。

• 三江並流

湖

雲南省地理上嘅一個重要特色，係分佈有37個高原湖泊（面積超過1平方千米者），令該省成為中國西南部最多淡水湖嘅省。呢啲湖喺成因上多屬於斷層陷落湖。呢啲湖之中，面積30平方千米以上嘅湖泊有9個，最大嘅係滇池，其次係撫仙湖、洱海、星雲湖、杞麓湖、陽宗海、瀘沽湖、程海、異龍湖。

地質

溫泉

• 安寧溫泉：天下第一湯
• 騰沖溫泉

熔洞

• 建水燕子洞
• 阿廬古洞
• 九鄉熔洞

火山

• 騰沖火山

行政區

雲南省目前管轄16個地級行政單位，包括8個地級市、8個自治州；以及129個縣級行政單位，包括12個市轄區、9個縣級市、79個縣、29個自治縣。

自然資源

雲南省嘅自然資源極為豐富，以「動植物王國」、「有色金屬王國」、「藥材寶庫」而著稱。

動植物王國

雲南幾乎集中咗從熱帶、亞熱帶至溫帶甚至寒帶嘅植物品種。喺全國大概3萬種高等植物中，雲南已經發現咗274科，2076屬，1.7萬種。

雲南獨特嘅氣候同埋地理環境，形成咗寒溫熱帶動物交彙嘅奇特現象。有脊椎動物1737種，其中獸類有300種，鳥類有793種，爬行類143種，兩棲類102種，淡水魚類366種；昆蟲1萬幾種。魚類中有5科40屬250種係雲南特有。鳥獸類中有46種係國家一級保護動物，154種係國家二級保護動物。

礦產

雲南被叫做「有色金屬王國」。　

雲南已發現各類礦產150多種，探明儲量嘅礦產92種，其中25種礦產儲量位居全國頭三名，54種礦產儲量居前十位，居全國首位嘅礦種有鋅、石墨、錫、鎘、銦、鉈同埋青石棉。雲南礦產資源共有9大類：黑色金屬礦產、能源礦產、有色金屬及貴金屬礦產、化工非金屬礦產、稀有及稀土礦產、特種非金屬礦產、冶金輔助原料礦產、建材非金屬礦產及彩石礦產等。雲南礦產具有種類多、品種全、分佈相對集中、富礦優質礦儲量所佔比重較大、共生伴生組份多等特點。

水力

雲南省降雨充沛，河流眾多，年徑流量達到200立方千米，係黃河嘅三倍。該省人均水資源超過10000立方米，係全國平均水平嘅4倍。

經濟

梯田

麗江嘅集市

雲南係中國經濟相對落後嘅省份，國內生產總值排名全國第19位，人均國內生產總值排名第29位（僅高過甘肅同埋貴州）。該省嘅貧困縣較多。1994年，該省喺貧困線（人均年收入300元）以下嘅人口有700萬，10年後降至286萬。73個縣主要依靠中央政府嘅財政支持。

雲南省嘅四大支柱產業係煙草、生物、礦產同埋旅遊。

長期以來，煙草業以佢高額利潤，成為雲南最重要嘅支柱產業。雲南生產嘅烤煙一直係中國生產高級捲煙嘅原料。1987年以後，雲南又成為中國最大嘅捲煙產地，此後十年間，雲南嘅經濟增長速度等五項指標一直位列中國榜首。雲南重喺中緬邊境嘅瑞麗開闢邊境貿易區。

2004年，雲南省嘅國內生產總值達到2959億元，年增長率達到8.1%，人均GDP達到5630元（680美元）。喺雲南省嘅GDP中，第一產業、第二產業同埋第三產業嘅比重分別為21.1%、42.8%同埋36.1%。

民族

雲南省係一個民族構成極為多樣化嘅省份，漢族同埋25個少數民族喺該省雜居。其中雲南獨有嘅少數民族有15個：白、哈尼、傣族、傈僳、拉祜、佤、納西、景頗、布朗、普米、阿昌、怒族、基諾、德昂、獨龍。喺各省級行政區中，佢嘅少數民族總人口（1433萬）名列第2位（僅次於廣西）。漢族佔總人口嘅比重為66.6%。少數民族佔雲南省總人口嘅比重為33.4%，該比例居全國各省級行政區嘅第7位（次於西藏、新疆、青海、廣西、貴州、寧夏）。其中人數最多嘅彝族佔總人口嘅11%，其他比重超過1%嘅民族依次為白族（3.6%）、哈尼族（3.4%）、壯族（2.7%）、傣族（2.7%）、苗族（2.5%）、回族（1.5%）、傈僳族等。超過5000人嘅少數民族睇下表：

民族	人口	聚居地	所屬語系	備註
彝族	471萬	雲南東部同埋中部各州市，包括紅河哈尼族彝族自治州、楚雄彝族自治州	藏緬語族
白族	151萬	大理白族自治州	藏緬語族
哈尼族	142萬	南部紅河哈尼族彝族自治州	藏緬語族
傣族	114萬	西南部中緬邊境嘅德宏傣族景頗族自治州同埋西雙版納傣族自治州	侗台語族
壯族	114萬	雲南東南部文山壯族苗族自治州	侗台語族
苗族	104萬	東部文山壯族苗族自治州、紅河哈尼族彝族自治州 、昭通市等地嘅山頂地帶	苗瑤語族
回族	64萬	遍布全省
傈僳族	61萬	西北部嘅怒江傈僳族自治州、麗江、迪慶	藏緬語族
拉祜族	45萬		藏緬語族
佤族	38萬	臨滄、西盟佤族自治縣
納西族	30萬	西北部嘅麗江市以及迪慶	藏緬語族
瑤族	19萬	紅河哈尼族彝族自治州、文山	苗瑤語族
景頗族	13萬	西部嘅德宏傣族景頗族自治州	藏緬語族
藏族	13萬	西北部嘅迪慶藏族自治州	藏緬語族
布朗族	9萬	西雙版納傣族自治州
布依族	5.5萬		侗台語族
阿昌族	3.4萬	德宏傣族景頗族自治州
普米族	3.2萬	西北部麗江、怒江	藏緬語族
蒙古族	2.8萬
怒族	2.8萬	西北部怒江傈僳族自治州碧江、福貢、貢山3縣嘅怒江大峽谷	侗台語族
基諾族	2.1萬	西雙版納傣族自治州
德昂族	1.8萬	德宏傣族景頗族自治州潞西市三台山同埋臨滄市鎮康縣軍弄		1985年以前叫做崩龍族
水族	1.3萬		侗台語族
滿族	1.2萬
獨龍族	5884	西北角怒江傈僳族自治州貢山縣獨龍江流域

雲南各民族嘅立體分佈非常明顯：其中有10個民族住喺河谷平壩：回族、白族、納西族、蒙古族、壯族、滿族、傣族、阿昌族、布依族同埋水族，共有450萬人口；住喺低山地區嘅有彝族、哈尼族、瑤族、拉祜族、佤族、景頗族、布朗族同埋基諾族，共有500萬人口；住喺高寒山區嘅有苗族、傈僳族、藏族、普米族、怒族同埋獨龍族，人口400萬。

雲南省嘅大部分少數民族文化教育水平較低，喺高校招生時，享有降低錄取分數線嘅優惠政策。不過，白族、納西族同埋回族由於文化教育水平較高，就冇呢個優惠政策。

雲南省大部分少數民族都唔受計劃生育政策影響。但係人口最多嘅3個少數民族：彝族、白族同埋哈尼族就必須實行計劃生育政策。

語言

雲南人用漢語嘅西南官話，同鄰近四川同埋貴州較接近。不過，雲南話一種漢語方言喺明代形成，但基礎方言就屬於江淮官話嘅南京話，直至今日，昆明話仍然有唔少地方同南京方言類似，例如經常不分/an/同埋/aŋ/。清代以後，雲南話受到湖廣、四川嘅西南官話嘅強烈影響。

喺雲南省，少數民族嘅語言包括藏緬語族嘅彝語、白語、藏語、哈尼語、景頗語、傈僳語、拉祜語、納西語；侗台語族嘅壯語、布依語、侗語、水語、傣仂語、傣哪語；以及苗語同埋瑤語。納西族用嘅東巴文，係世界上唯一重用緊嘅象形文字。

文化程度

1998年尾，全省人口中，大學以上文化程度419800人，高中程度211萬人，初中程度830萬人，小學程度1825萬人，15歲以上文盲825萬。

宗教

可統計嘅403萬信仰宗教者中，90%以上係少數民族。

佛教

合法宗教場所2333處，統計到嘅佛教信徒大概有256萬幾人。主要有三大教派：

• 小乘佛教：幾乎係傣族、布朗族同埋德昂族嘅全民信仰。西雙版納、孟連、耿馬嘅男童多數要喺佛寺做一段時間和尚，學傣文同埋佛教教義，少就幾個月，多就幾年。德宏傣族景頗族自治州嘅傣族就冇呢種風俗。
• 藏傳佛教（喇嘛教）：幾乎係藏族全民信仰，喺迪慶州等藏區，每個有人住嘅地方都有寺院同埋經幡。雲南最出名嘅藏傳佛教寺院係香格里拉縣嘅噶丹松贊林寺（「小布達拉宮」）。
• 大乘佛教：有一部分漢族信奉。被列為漢族地區全國重點寺院嘅有：大理白族自治州賓川縣雞足山祝聖寺、銅瓦殿，以及昆明筇竹寺、圓通寺、華亭寺。

伊斯蘭教

回族穆斯林幾乎遍布雲南全境，有大概62萬幾人，清真寺810處。每個回族村莊高高聳立嘅邦克樓係雲南醒目嘅景觀之一。喺元明清三代，1872年大理杜文秀回民政權被鎮壓之前，穆斯林喺雲南總人口中曾經佔有好大嘅比重，並控制該省嘅商業（馬幫）。

基督教

雲南省統計到嘅基督教徒大概有53萬幾人，合法宗教場所2050處。雲南省信奉基督教新教嘅信徒大部分集中喺邊緣偏僻嘅山區，以少數民族為主。主要嘅分佈地包括：

1. 西北部中、緬、印邊境嘅怒江傈僳族自治州，信徒主要係傈僳族，以及怒族、獨龍族；
2. 東北部昭通市、武定縣等地，信徒主要係苗族以及彝族；
3. 西南部中緬邊境嘅德宏傣族景頗族自治州，信徒主要係景頗族；思茅市瀾滄縣（有著名嘅糯福教堂），信徒主要係拉祜族同埋佤族。

基督教新教傳入雲南始於1881年，由中國內地會嘅傳教士傳入大理，跟住嗰年傳入昆明。

2004年，昆明重建咗中國內地會創立嘅三一聖堂（家下叫三一國際禮拜堂）。

歷史上，英美傳教士對雲南一啲少數民族嘅社會文化產生過巨大影響。原有嘅拜物教同埋巫術衰落，一夫一妻制取代咗群婚制同埋血緣婚，酗酒、賭博現象消失，創制咗10種民族文字（景頗文、苗文、拉祜文、佤文、西傈僳文同埋東傈僳文等），並創辦現代學校。

道教

雲南省統計到嘅道教信徒大概有24萬人，合法宗教場所127處，包括大理白族自治州巍山縣嘅巍寶山以及昆明金殿、黑龍潭等。

天主教

雲南省統計到嘅天主教徒大概有6.6萬餘人，合法宗教場所58處。曾經建立昭通、昆明、大理3個主教區同埋西康教區嘅雲南總鐸區（喺迪慶藏族自治州，有著名嘅茨中教堂）。

東巴教

歷史上，麗江嘅納西族中曾經流行過東巴教。

本主崇拜

大理白族普遍信仰。

文化

麗江嘅春聯

迪慶嘅喇嘛

• 歷史文化名城：
  • 昆明（1）
  • 大理（1）
  • 麗江（2）
  • 建水（3）
  • 巍山（3）

• 摩梭人
• 東巴古樂
• 東巴文字
• 白族三月街
• 彝族火把節
• 傣族潑水節

• 當地名產小食
  • 過橋米線
  • 宣威火腿
  • 野生食用菌
  • 三七汽鍋雞

• 有關雲南嘅電影：

喺1949年以後拍攝嘅兩千幾部電影之中，有關雲南少數民族題材嘅電影有150幾部，其中《阿詩瑪》（以石林為背景）、《五朵金花》（以大理為背景）、《孔雀公主》（以瑞麗為背景）喺當時產生咗好大影響。《諾瑪嘅十七歲》（以元陽哈尼為背景）、《花腰新娘》、《好大一對羊》等影片獲得大獎，而《千里走單騎》、《神話》、《無極》等影片亦選擇喺雲南進行拍攝。

旅遊

雲南嘅旅遊資源相當豐富，以佢美麗嘅自然風景、多彩嘅民族風俗同埋宜人嘅氣候成為重要嘅旅遊目的地。

• 麗江古城，納西族古城，（聯合國教科文組織世界文化遺產，1997年）
• 瀘沽湖
• 西雙版納傣族自治州首府景洪
• 香格里拉（原名中甸）
• 大理：南詔國同埋大理國舊都
• 三江並流（聯合國教科文組織世界自然遺產，2003年）
• 石林，位於昆明以東90千米處嘅喀斯特地形區
• 元江哈尼族梯田

交通

貨船

鐵路

雲南嘅第一條鐵路唔係通去中國其他省份，而係由昆明通往越南港口城市海防嘅滇越鐵路，呢個係一條由法國工程師設計嘅窄軌鐵路，1910年通車。此後，「鐵路唔通國內通國外」曾經長期被列為「雲南十八怪」之一。直到1960年代中國開始三線建設後，雲南省至陸續修建貴昆鐵路（1966年通車）、成昆鐵路（1970年通車），同全國鐵路網相連。1990年代以後，又陸續修築通往省外嘅南昆鐵路（886千米）同埋內昆鐵路，以及省內嘅昆玉鐵路（昆明到玉溪，55千米，1993年通貨車，1998年通客車）、廣大鐵路（1998年通車，213千米，將昆明同埋大理連接起嚟）、大麗鐵路（大理—麗江，2009年9月通車，將來準備繼續延伸，修築滇藏鐵路）。

目前雲南起緊嘅鐵路有：

• 昆明至廣通複線鐵路：作為成昆鐵路擴能改造的嘅首段，係昆明鐵路局承建嘅第一條時速200公里嘅雙線電氣化山區鐵路，東起昆明，西至楚雄州祿豐縣廣通鎮。
• 大理至瑞麗鐵路大保段：設計時速140 km，批複投資60.13億元。
• 長昆客運專線雲南段：滬昆客運專線中嘅一段，途經湖南、貴州、雲南三省，全長1167公里，項目投資1601.4億元。雲南段全長184.7公里，係雲南第一條高速鐵路。

公路

公路係雲南省省內交通嘅主要方式。所有縣城都有通去昆明嘅全天候公路，所有鄉鎮都通公路（最後一個通公路嘅係貢山縣獨龍江鄉，每年之中有半年能夠通車）。2005年尾，該省嘅公路總里程達到16.7萬千米，居中國各省第一位。其中已經建成嘅高速公路1421千米，包括昆明經大理到保山、昆明到墨江（到景洪嘅中途）、昆明到曲靖、昆明到石林。計劃到2020年令全省嘅高速公路總里程達到6000千米，完成通往周邊國家緬甸、老撾、越南同埋泰國嘅高速公路網。

水路

整體嚟講，雲南境內嘅河流絕大多數唔啱船行。五級以上等級航道僅有506千米，而且大部分集中喺內陸湖泊，極少有長距離航線。1995年，雲南省投資開闢瀾滄江航線。

機場

雲南有1個一級機場：昆明長水國際機場，位於市區東北，離市中心有24.5千米，2012年6月28號啟用，取代咗以往嘅昆明巫家壩國際機場。

教育

2007年，雲南省有51間普通高校，佔中國1909間普通高校嘅2.6%。其中本科院校17間，設喺昆明市嘅有12間：雲南大學、昆明理工大學、雲南農業大學、雲南師範大學、雲南財經大學、雲南民族大學、西南林學院、昆明醫學院、雲南中醫學院、雲南警官學院、雲南藝術學院同埋昆明學院；另外喺大理、蒙自、曲靖、玉溪同埋楚雄各設有一間本科院校，即大理學院、紅河學院、曲靖師範學院、玉溪師範學院、楚雄師範學院。雲南省冇教育部直屬嘅高等院校，僅有一座高校（雲南大學）被列入中國重點建設嘅大概100間大學（“211工程”）名單中。

1949年後主要領導人

• 省委書記
  • 宋任窮
  • 謝富治
  • 閻紅彥
  • 周興
  • 賈啟允
  • 安平生
  • 普朝柱
  • 高嚴
  • 令狐安
  • 白恩培（2001年10月- ）

（截至2006年1月）

• 省長
  • 陳賡
  • 郭影秋
  • 於一川
  • 周興
  • 譚甫仁
  • 周興
  • 賈啟允
  • 安平生
  • 劉明輝
  • 普朝柱
  • 和志強
  • 李嘉廷
  • 徐榮凱（2001年6月- 2006年12月）
  • 秦光榮（2006年12月-）

（截止至2007年1月）

特產

• 雲南白藥
• 雲子
• 宣威火腿
• 香煙
• 野生食用菌
• 普洱茶
• 文山三七

運動

職業隊：

• 籃球

旅遊

• 旅遊人生-中國西南版（香港/繁體中文）

出面網頁

• 雲南省政府
• 雲南地圖
• 雲南相片
• [13]