冬菇頭

冬菇頭（粵音：dung1 gu1 tau4）係一款短髮型，喺英文入面嗌做bob cut，因為好整理，多數家長都幫啲細路女剪呢款髮型，所以啲外江人嗌呢種款式做「妹妹頭（粵音：mui4 mui2 tau4）」。

第一次世界大戰之前，多數女仕都留長頭髮，當時歐美地區相當保守，除咗細路女、戲子之外，極少婦女剪短啲頭髮。第一次世界大戰爆發後，喺戰區服務啲婦女，剪短啲頭髮乾淨俐落方便做嘢。

冬菇頭基本款，係將啲頭髮剪到兩邊腮骨牙拗個位，啲頭髮長度唔過膊頭，額頭有瀏蔭。啲髮型設計師，設計咗好多款冬菇頭，呢幾年更加發展出「唔對稱冬菇頭」。碧咸嘅個老婆維多利亞都剪過冬菇頭，仲係佢專屬嘅「Posh bob」（豪門冬菇頭）。