卞夫人
卞夫人（粵拼：bin6 fu1 jan4；161年—230年[註 1]），琅邪開陽人（而家山東臨沂），係曹操嘅正室夫人，諡宣。由於曹操係三國中曹魏嘅奠基人，喺日後追諡爲魏武帝，所以佢嘅諡號係同夫君嘅諡合爲武宣皇后（mou5 syun1 wong4 hau6）。
| 卞氏 | |||
|---|---|---|---|
| 武宣皇后 | |||
| 私人明細 | |||
| 夫君 | 曹操 | ||
| 仔女 | 曹丕 曹彰 曹植 曹熊 | ||
| 尊位 |
| ||
| 諡號 | 宣 | ||
| 父 | 卞遠 | ||
| 出世 | 延熹三年（161年）十二月 齊郡白亭 | ||
| 過世 | 太和四年（230年）五月（69歲） 洛陽 | ||
| 安葬 | 太和四年七月 魏高陵 | ||
想搵第二個意思嘅話，請睇卞皇后。生平
編輯卞夫人姓卞，名唔知，本來係琅琊郡開陽縣人[註 2]。佢嘅出身係個歌女（藝伎），流落到沛地嘅譙縣[註 3][1]。
虛歲20歲嗰年，佢畀曹操納做妾[1]。嗰陣時曹操做緊頓丘縣令。之後佢陸續同曹操生出四個仔，分別係曹丕、曹彰、曹植、曹熊。
卞夫人係個有本事嘅人。190年，佢30歲，當時曹操因爲董卓作亂出走避難，有謠言話曹操死咗。曹氏下面啲人都驚青慌亂，得卞夫人保持平靜，佢無急住信呢個謠言，勸啲人唔好過於驚慌。果然之後曹操返來。知咗件事後，曹操好欽服佢[4]。
曹操原本有個正室丁氏，養住曹操同劉夫人生嘅仔曹脩。之後曹脩死咗，丁氏經常同曹操係噉喊苦喊忽，結果畀曹操趕佢返外家。過咗好耐曹操先去外家，落曬面𠱓（ngai1）佢，想佢一齊返屋企，但丁氏就係唔騷佢。於是曹操同佢斷絕夫妻關係，嗌外家畀佢改嫁，將卞夫人升做大婆。但外家唔敢畀佢返頭嫁，就噉成咗棄婦。卞氏生性寬仁，雖然丁氏喺度時話佢係妾仔、作爲大婆睇佢同佢啲仔唔起，但卞氏唔計較過往，當曹操唔喺屋企時，就派人送嘢畀丁氏，又私自請佢返曹家，對佢款待周到。丁氏就好多謝佢，話自己都廢咗嘞，使乜似以前噉咁客氣呀。後來丁氏過身，卞氏睇佢雖則同曹操唔啱雅，但話曬夫妻一場，就請曹操執咗佢，於是丁氏得以葬喺許城嘅南面[5]。
另外除咗曹脩，丁氏重養埋劉夫人粒女（清河公主，大女，即係長公主），休咗後粒女留喺曹操屋企。卞氏幫曹操湊大嗰啲無咗老母嘅仔女[5]，其中清河公主長大成人後，嫁咗畀夏侯惇嘅二仔夏侯楙（喺《三國演義》就寫成夏侯楙係夏侯淵嘅仔）。
216年，曹操封做魏王。219年，卞夫人封做魏國王后[6]。
220年年頭，曹操過身，曹丕繼位做魏王，卞氏變成王太后[2]。
220年農曆十月，曹丕爭得漢獻帝個位，稱做皇帝，卞氏變成卞太后——曹魏第一位太后，由王太后變成皇太后[2]。
卞太后呢四個仔中，最大嘅仔曹丕即係魏文帝，二仔曹彰係曹氏軍隊中有才能嘅員將，三仔曹植喺詩文方面好出名，四仔曹熊早死[註 4]。
到佢老時，卞太后證見呢啲仔之間嘅不和景象，主要係曹丕壓迫各個細佬。
曹彰雖然封到王，不過無耐之後被召入京城洛陽，到223年時就好突兀噉死咗。書《世說新語》就話，曹彰共曹丕喺卞太后嘅閣樓度捉棋，曹丕畀佢食落咗毒嘅棗。卞太后叫下人攞水去畀曹彰，但啲裝水器皿預先畀曹丕落令破壞曬，卞太后快啲走去井度抽水畀二仔，但搵唔見個桶。於是曹彰中毒身亡[7][註 5]。
曹植畀曹丕降咗爵位。之後佢升做王嘅爵位，不過一直畀曹丕嘅人密切監察住。
226年，曹丕喺佢40歲時過世，佢嘅仔曹叡繼位，即係魏明帝。卞太后尊做太皇太后[2]。佢提議佢嘅孫曹叡關心下曹操最細嘅仔曹茂（即係曹叡嘅叔仔），佢係曹操同妾仔趙姬生嘅仔，由於佢同曹操、曹丕都不和，所以係唯一無封王嘅人。魏明帝於是封曹茂做聊城公，之後升爲聊城王[8]。
230年，卞太皇太后喺京城洛陽過世，享壽69歲。由於曹操追尊爲魏武帝，而佢上嘅諡係宣，所以尊做武宣皇后，同曹操合葬[2]。
家眷
編輯喺《三國演義》
編輯喺羅貫中小說《三國演義》度，卞夫人好少提到。羅貫中無寫到卞夫人平靜噉相信曹操喺變亂中重在生嘅情節。
喺小說第79回，卞太后證見曹丕逼壓曹植作《七步詩》、若果作唔出就要處罪嘅景象。曹植悲憤噉作完首詩，詩中打個譬喻，描寫豆梗做柴火煮緊鑊中嘅豆粒嘅景象，一如家中兄弟互相殘害。聽完首詩，卞太后十分之心痛，走出來指責曹丕。但實際上七步詩嘅事正史搵唔到，首詩亦唔見於曹植嘅文集，所以有無呢件史實歷來好大爭議。呢首詩見於《世說新語》同《三國演義》，版本唔同，件事可能虛構，作者羅貫中攞件事來用在於佢以漢室做正統，而總係批判曹魏嗰派。雖然曹丕同曹植相處得唔好，但未至於要噉樣將曹植趕入窮途絕路[註 6]。
睇埋
編輯參攷資料
編輯- 陳壽（著）；裴松之（注）。〈魏書 — 后妃傳：武宣卞皇后傳〉. 《《[[三國志]]》》。
- 黎東方 (2007年)。《《細說秦漢》》。上海人民出版社。ISBN 9787208068179。
- 黎東方 (2007年)。《《細說三國》》。上海人民出版社。ISBN 9787208068025。
- 易中天 (2006年)。《《品三國》》。上海文藝出版社。ISBN 9787532130436。
註
編輯- ↑ 據《三國志》，話卞夫人喺延熹三年十二月己巳出世[1]，喺太和四年五月過世[2]。延熹三年十二月即西曆161年嘅1月15號～2月12號之間，太和四年五月即西曆230年5月30號～6月28號之間[3]。
- ↑ 而家山東臨沂北面。
- ↑ 而家安徽亳州。
- ↑ 《三國演義》寫就話曹熊因爲老豆死時無去追思，於是畏罪自殺。
- ↑ 不過葉嘉瑩指出，黃初四年，諸王來朝係農曆五月，嗰陣時棗未熟，所以無可能用棗毒殺人。曹丕要約束諸王都毋須做到咁絕。兼且後面講嘅「東阿」指曹植封做東阿王，但佢係魏明帝時封王嘅，而唔係魏文帝時。所以曹彰應該係暴病而死。《世說新語》可以當做佢哋兄弟不和而產生嘅坊間傳聞。
- ↑ 而支持有呢件事嘅觀點認爲，正史無記到嘅嘢唔等於無；亦有觀點認爲件事係有，但首詩係後人偽託嘅。
攷
編輯- ↑ 1.0 1.1 1.2 陳壽（著）；裴松之（注）。〈魏書 — 后妃傳：武宣卞皇后傳〉. 《《三國志》》。｢武宣卞皇后，琅邪開陽人，文帝母也。本倡家，〈魏書曰：後以漢延熹三年十二月己巳生齊郡白亭，有黃氣滿室移日。父敬侯怪之，以問卜者王旦，旦曰：『此吉祥也。』〉年二十，太祖於譙納后為妾。後隨太祖至洛。｣
- ↑ 2.0 2.1 2.2 2.3 2.4 陳壽（著）；裴松之（注）。〈魏書 — 后妃傳：武宣卞皇后傳〉. 《《三國志》》。｢二十五年，太祖崩，文帝即王位，尊后曰王太后，及踐阼，尊后曰皇太后，稱永壽宮。……明帝即位，尊太后曰太皇太后。……至太和四年…其年五月，後崩。七月，合葬高陵。｣
- ↑ 〈兩千年中西曆轉換〉。中華民國中央研究院資訊服務處。
- ↑ 陳壽（著）；裴松之（注）。〈魏書 — 后妃傳：武宣卞皇后傳〉. 《《三國志》》。｢及董卓為亂，太祖微服東出避難。袁術傳太祖兇聞，時太祖左右至洛者皆欲歸，后止之曰：『曹君吉兇未可知，今日還家，明日若在，何面目復相見也？正使禍至，共死何苦！』遂從后言。太祖聞而善之。｣
- ↑ 5.0 5.1 陳壽（著）；裴松之（注）。〈魏書 — 后妃傳：武宣卞皇后傳〉. 《《三國志》》。｢〈建安初，丁夫人廢，遂以后為繼室。諸子無母者，太祖皆令后養之。魏略曰：太祖始有丁夫人，又劉夫人生子脩及清河長公主。劉早終，丁養子脩。子脩亡於穰，丁常言：『將我兒殺之，都不復念！』遂哭泣無節。太祖忿之，遣歸家，欲其意折。後太祖就見之，夫人方織，外人傳云『公至』，夫人踞機如故。太祖到，撫其背曰：『顧我共載歸乎！』夫人不顧，又不應。太祖卻行，立於戶外，復云：『得無尚可邪！』遂不應，太祖曰：『真訣矣。』遂與絕，欲其家嫁之，其家不敢。初，丁夫人既為嫡，加有子脩，丁視后母子不足。后為繼室，不念舊惡，因太祖出行，常四時使人饋遺，又私迎之，延以正坐而己下之，迎來送去，有如昔日。丁謝曰：『廢放之人，夫人何能常爾邪！』其後丁亡，后請太祖殯葬，許之，乃葬許城南。……〉｣
- ↑ 陳壽（著）；裴松之（注）。〈魏書 — 后妃傳：武宣卞皇后傳〉. 《《三國志》》。｢二十四年，拜為王后，策曰：『夫人卞氏，撫養諸子，有母儀之德。今進位王后，太子諸侯陪位，群卿上壽，減國內死罪一等。』｣
- ↑ 劉義慶。〈第三十三卷：尤悔〉. 《《世說新語》》。｢魏文帝忌弟任城王驍壯。因在卞太后閤共圍棊，並噉棗，文帝以毒置諸棗蔕中。自選可食者而進，王弗悟，遂雜進之。既中毒，太后索水救之。帝預敕左右毀缾罐，太后徒跣趨井，無以汲。須臾，遂卒。復欲害東阿，太后曰：『汝已殺我任城，不得復殺我東阿。』｣
- ↑ 陳壽。〈魏書 — 武文世王公傳：樂陵王曹茂傳〉. 《《三國志》》。｢茂性泬佷，少無寵於太祖。及文帝世，又獨不王。太和元年，徙封聊城公，其年為王……太皇太后數以為言。……今封茂為聊城王，以慰太皇太后下流之念。｣