基斯頓九世
基斯頓九世（丹麥文：Christian IX，1818年4月8號—1906年1月29號），又叫基斯坦九世，係丹麥國王，1863年去到1906年在位。同時，佢亦係士叻斯域、荷斯地因同格呂克斯堡公爵。
| 基斯頓九世 | |
|---|---|
 | |
| 丹麥國王 | |
| 在位 | 1863年11月15號ー1906年1月29號 |
| 加冕 | 1863年11月15號 |
| 前任 | 費特力七世 |
| 繼任 | 費特力八世 |
| 配偶 | 露易絲公主 |
子嗣 | |
| 父王 | 腓特烈·威廉 |
| 母后 | 路易絲·加羅琳 |
| 出世 | 1818年4月8號 |
| 出世地 | 石勒蘇益格公國戈托夫城堡（即依家嘅德國士叻斯域-荷斯地因） |
| 死 | 1906年1月29號（87歲） |
| 死地 |  丹麥哥本哈根阿馬林堡宮 |
簡歷
編輯家族同早年
編輯1818年，基斯頓響石勒蘇益格公國戈托夫城堡（即依家嘅德國士叻斯域-荷斯地因）出世，係士叻斯域-荷斯地因-森訥堡公爵腓特烈·威廉同路易絲·加羅琳嘅第四個仔，第六個細路。佢嘅名「基斯頓」，係嚟自佢嘅教父，即後嚟嘅丹麥國王基斯頓八世。
佢係年輕者漢斯嘅直系後代，所以佢亦係丹麥國王基斯頓三世嘅眾多後人之一（漢斯係基斯頓三世個細仔）。基斯頓個老豆腓特烈·威廉係士叻斯域-荷斯地因-森訥堡-碧克家族嘅首領，所以基斯頓本人亦係士叻斯域-荷斯地因-森訥堡公爵嘅繼承人之一，不過佢唔係第一繼承人。
佢自細就響戈托夫城堡同屋企人一齊生活。去到1825年，佢老豆畀人加多個銜頭「格呂克斯堡公爵」，因為格呂克斯堡家族冇後人繼承。之後，佢哋成家人搬到格呂克斯堡城堡住。1831年老豆死咗後，佢就留響丹麥生活，亦響哥本哈根一間軍事學院讀書。
丹麥王儲
編輯1851年，當時丹麥王室淨低兩位男性成員：國王費特力七世、同佢阿叔費迪南王子。由於兩個人都冇仔女，所以當佢哋響無仔女嘅情況下走咗，就根據費特力三世頒發嘅繼承法，畀女性做丹麥女王，並且係同時任國王血緣最近嘅女人繼位。當時，王位繼承順序如下：
由於前兩個人都分別因為年紀大而冇仔女，唔可能做女王，所以腓特烈·威廉係當時嘅假定繼承人。但由於佢係德國貴族，而德國同丹麥關係唔好；加上腓特烈·威廉個老婆係俄羅斯貴族，丹麥人又好鬼死憎俄羅斯人。腓特烈·威廉最終響1851年同阿媽夏洛特公主、大家姐瑪麗·路易絲公主宣佈齊齊放棄王位繼承身份。而丹麥國會就響一年後，宣佈擁立第五順位繼承人露易絲公主個老公基斯頓，做丹麥王儲。
但係呢個方法亦受到一部份人嘅質疑。有唔少歐洲貴族開始希望攞走丹麥王位，其中威廉二世個外父費特力更加響1863年稱帝，話自己係費特力八世。不過咁樣都阻止唔到基斯頓響1863年11月15號登基做丹麥國王，係基斯頓九世，開始丹麥格呂克斯堡王朝。
國王時期
編輯
響1863年基斯頓九世簽咗十一月憲法，其中表示丹麥唔會直接食咗士叻斯域，而係成立一個特別議會（Rigsraadet），處理士叻斯域－荷斯地因嘅嘢。但係響一年後，就爆發咗普丹戰爭，因為普魯士唔滿意十一月憲法。丹麥最後輸咗，又冇咗士叻斯域－荷斯地因呢兩個公國。士叻斯域響1865年併入咗奧地利，而響1866年，俾斯麥策劃普奧戰爭，最後奧地利響薩多瓦會戰入面輸清光，德意志邦聯解散。
響輸咗之後，基斯頓九世一度諗住同德國講數，提出希望要返士叻斯域－荷斯地因，而條件係成個丹麥加入德意志聯邦。但係俾斯麥最後都拒絕咗，因為俾斯麥驚控制唔到丹麥人同德國人之間嘅種族衝突同鬥爭。
受到1864年普丹戰爭嘅影響，基斯頓九世一直唔擺心機落國事上，因為佢驚失敗。之後佢更加支持獨裁者雅各·埃斯翠普，希望阻止民主響丹麥嘅蔓延。種種表現令到佢響人民心目中一啲都唔受歡迎。
不過響1874年，佢簽咗法案畀冰島有自己嘅憲法，雖然當時冰島係屬於丹麥嘅地方。1901年，佢要求Johan Henrik Deuntzer組建內閣，促進咗Deuntzer內閣嘅達成。呢個內閣係第一個唔屬於右派而係丹麥自由黨嘅內閣，雖然右派響丹麥國民議會有大多數議席。呢點係丹麥傳統議會制嘅開始。
1866年，佢修訂丹麥憲法，令到上議院有畀下議院更高嘅權力。另外，佢改善丹麥嘅社會保障機制。1891年，佢引入退休金，一年之後又引入失業同屋企福利。呢啲都令到佢嘅聲望變好。
1906年，基斯頓九世響阿馬林堡宮走咗，終年87歲，結束咗佢四十二年嘅國王生涯。佢畀人葬響羅斯基勒主教座堂。佢走咗之後，王位由佢個大仔費特力王儲接任，係費特力八世。
後人
編輯
1842年，佢同基斯頓八世個外甥女露易絲公主結婚，有三個仔三個女：
- 費特力八世（1843年—1912年），1906年繼位做丹麥國王
- 亞歷珊卓公主（1844年—1925年），嫁畀英王愛德華七世，後嚟嘅英國王后、王太后
- 佐治一世（1845年—1913年），1863年畀希臘國會擁立做希臘國王
- 達吉瑪公主（1847年—1928年），嫁畀沙皇亞歷山大三世，改名叫瑪麗亞·費奧多羅芙娜
- 賽拉公主（1853年—1933年），漢諾威王儲妃
- 法德馬王子（1858年—1939年），曾經畀人擁立做保加利亞國王，畀基斯頓九世拒絕
「歐洲外父」
編輯
佢有一個同英女皇維多利亞好似嘅花名，就係「歐洲外父」（另外一個係黑山親王尼古拉一世）。咁係因為佢六個仔女都分別同唔同王室結婚，之後佢哋嘅後人又同其他王室結婚。基斯頓嘅六個仔女入面，其中四個唔係國王就係王后，分別掌控丹麥、希臘、俄羅斯、英國王位。佢個細仔法德馬更加響1886年畀人擁立做保加利亞國王，如果唔係基斯頓九世拒絕，佢就有更多後人做國王。
之所以有咁多後人做國王，唔係基斯頓九世嘅功勞，好大程度係佢老婆露易絲出於政治目的而搞出嚟嘅。因為當時丹麥響歐洲唔算強國，所以歐洲國家唔驚同丹麥王室結婚，就算同丹麥王室嘅人結婚後都唔會引起太大負面影響。
佢有幾個孫仔都做咗國王，包括沙皇尼古拉二世、希臘國王康士坦丁一世、英王佐治五世、丹麥國王基斯頓十世，仲有響1905年挪威獨立之後畀人擁立做國王嘅哈康七世。
響現今多國國王入面，有唔少都係佢嘅後人，有：丹麥女王瑪嘉烈二世、英女皇伊利沙伯二世、比利時國王菲臘、挪威國王哈拉德五世、盧森堡大公亨利、西班牙國王菲臘六世；而響王室入面，就有：愛丁堡公爵菲臘親王、西班牙王后蘇菲亞。另外，羅馬尼亞最後一任國王米哈伊一世都係佢嘅後人。
 |