感恩節

感恩節（英文：Thanksgiving Day；法文：Action de grâce）係美國同加拿大都有嘅節日，為咗感謝上天過去一年嘅贈與同豐收。感恩節通常會食火雞、薯蓉同南瓜慶祝。

《第一個感恩節》（The First Thanksgiving），Jean Leon Gerome Ferris嘅畫

喺美國，感恩節由17世紀已經開始慶祝。由1941年開始，定咗喺每年11月第四個禮拜四慶祝，並且從嗰日起連續放兩日假，通常大家都會認為呢一日係標誌住聖誕採購季節正式開始。聯合國總部亦都會喺感恩節當日放假。

而加拿大就由1879年開始正式慶祝感恩節，起初係喺10月同11月之間浮動，一戰後定咗喺11月11號和平紀念日，1931年再搬去每年10月第二個禮拜一（同美國嘅哥倫布日同一日），1957年立法規定感恩節係10月第二個禮拜一。

美國感恩節來歷

1620年，一隻叫五月花號嘅客船，由英國普利茅夫開往喺北美洲麻省普利茅夫殖民地，船上載住好多清教徒（加爾文宗）。當年冬天，唔少人餓死凍死，有啲人仲病死。當地原住民印第安人幫新移民學識咗點樣打獵、種粟米同南瓜，仲喺第二年得到豐收。喺慶祝豐收嘅時候，呢啲歐陸嚟嘅新移民就邀請印第安人一齊多謝上帝嗰一年嘅賜予。