慣性
慣性（粵音：gwaan3 sing3；英文：inertia）喺物理學入面指物體「抗拒自身速度被改變」嘅特性，速率同方向都係傾向「抗拒改變」嘅。牛頓第一定律有詳細描述慣性。依條定律講，冇外力作用嘅時候，一嚿物體會保持靜止或者以恆定速度直線噉郁動。慣性係所有物體都有嘅屬性，無論佢哋係靜止定郁緊，佢哋都傾向會保持依個狀態，除非有外力施落去，例如摩擦力、重力或者人為推動呀噉。
慣性質量
編輯睇埋：質量
慣性同質量息息相關。一嚿物體嘅質量越大，佢嘅慣性就越大。即係話，質量越大嘅物體就越難改變佢嘅郁動狀態。當人推郁一架靜止嘅車或者用腳踢一個足球，會發現要推郁一架車比較困難，噉係因為汽車質量大，慣性亦都大。
喺日常生活當中，慣性嘅例子周圍都搵得到。想像有個人坐住一架行駛緊嘅巴士，如果巴士突然急煞車，個人會因為慣性而向前傾。又例如，一個郁緊嘅足球會因為同地面有摩擦力而慢慢停低。如果冇咗摩擦力，個波將會無限噉向前郁，直到有外力干預為止。
歷史發展
編輯睇埋：牛頓運動定律
慣性嘅概念可以追溯到古代哲學家同科學家。例如亞里士多德認為物體要保持運動必須不斷受到外力推動[未記出處或冇根據]。不過後來伽利略發現，其實物體只係因為摩擦力先會減慢同停止，佢指出冇摩擦力嗰時，物體會保持恆定嘅速度直線運動。艾碩·牛頓根據伽利略嘅發現，開展佢嘅牛頓運動定律，當中慣性仲係牛頓第一定律嘅核心概念。
慣性唔只係理論物理概念，仲對工程領域有重大影響。例如航天工程，要設計衛星同飛船時，設計師要諗埋慣性同質量嘅關係，確保衛星可以喺太空裡便自動保持軌道運行。而且慣性係研究嘅撞擊一個重要因素：撞車嗰陣啲物體會因為慣性而保持郁動方向，導致撞擊嗰股力加劇。