比喻

比喻（粵拼：bei2 jyu6），又叫譬喻、打比方，係種修辭手法，即係指用一樣嘢，去指成、比作另一樣有相似之處嘅嘢。

比喻利用咗事物相似嘅地方，可以將熟悉嘅嘢取代生疏嘅嘢；具體嘅嘢取代抽象嘅嘢；顯淺嘅嘢取代深奧嘅嘢，而幫助理解。比喻仲可以用嚟搞笑。

分類

睇埋：修辭手法

比喻嘅手法可以分做三種：明喻、暗喻、借喻。

• 明喻：句子用喻詞「好似、猶如...」，有提個主體。

  例句：「白雪公主嘅肌膚好似雪咁白，朱唇好似玫瑰咁紅，而秀髮就好似炭咁黑。」

  例句：「離遠嘅一盞盞街燈，就好似夜空上邊嘅星星噉。」

  例句：「如花佢真係人如其名，似一朵花咁靚。」

• 暗喻：句子用喻詞「係...」，有提個主體。

  例子：「蓮，花之君子者也。」（文言）—— 出自好出名嘅北宋古文《愛蓮說》（周敦頤）

  → 粵譯：「蓮花，就係花當中嘅君子。」

  → 呢度將蓮花暗喻為「花當中嘅君子」。

• 借喻：句子唔用喻詞，唔提個主體，直頭用喻體取代咗個主體。

  將上句用借喻改成下句嘅例子：

  A 君：「阿蓮佢又後生又靚，但係嫁畀個咁猥瑣嘅男人。」

  B 君：「一朵鮮花插咗喺牛屎上邊。」

  上句主體 → 下句喻體：阿蓮 → 鮮花

  上句主體 → 下句喻體：猥瑣嘅男人 → 牛屎

睇埋

• 聯想意思
• 語義距離