海水化淡

海水化淡（粵拼：hoi2 seoi2 faa3 taam5），顧名思義，海水化成淡水咁解，當今食水來源之一。簡單而言，抽走海水之中鹽份同雜質，直至可以畀人飲。當中涉及能源，有時會好貴。至早有蒸餾，煲滾海水，由得水以蒸汽飄去另一缸，再凍返化成淡水。新啲會用滲透壓，類似生物過程，以膜抽出水份。

類似亦廢水化成淡水，用來做食水。

各地情況

香港曾經有海水化淡廠，1982年因為石油價格大升，令到成本變得過高而停用，1992年拆咗。政府喺2019年批准興建將軍澳海水化淡廠，第一期工程2023年12月正式開始供水，為西貢、九龍東同港島部分地區提供食水。^[1]

熱能海水化淡嘅原理係利用高溫蒸餾海水，繼而將沸騰而冇含有鹽份嘅水蒸汽冷凝並收集而達至化淡效果。熱能海水化淡可以分為三種：

多級閃蒸法(英文叫做Multi-Stage Flash distillation，MSF)^[2]，係一種用多級真空（減壓）加熱既方法，將啲海水蒸發脫鹽。
蒸汽壓縮法(英文叫做Vapor Compression，VC)^[3]，可以再細分做機械壓縮(英文叫做Mechanical Compression)同埋熱壓縮(英文叫做Thermal Compression)。
多效蒸餾法(英文叫做Multiple Effect Distillation，MED)^[2]，係一種用多級串聯蒸發既方法，將啲海水蒸發脫鹽。

多級閃化法運用蒸餾嘅原理，將海水中嘅水份轉變成蒸汽，同海水中嘅鹽份分離。然後再將蒸汽冷凝之後就可以製成淡水，並用呢個方法重複幾次來增加效率。多級閃嘅好處係產量較大，但係由於需要大量能源，所以主要係中東產油國採用嘅。

逆滲透法係海水化淡最常見嘅處理技術之一，原理主要係：

喺半透膜兩邊分別係淡水同含鹽類嘅溶液。喺自然定律之下，溶液會通過半透膜由較低濃度（清水）移動去較高濃度（鹽水）嘅一邊。

淡水通過半透膜，直到膜兩邊化學勢能達到平衡為止。當兩邊嘅壓力差等於滲透壓嘅時候，溶液就會達到平衡狀。

若果喺鹽水一邊施以大於滲透壓嘅壓力嘅時候，鹽水嘅化學勢能會高於清水，噉就會令到鹽水中嘅水份，通過半透膜流向清水嗰邊，呢種現象就係逆滲透。