粉彩畫

粉彩畫（粵音：fan2 coi2 waa2 | 英文：pastel painting）係指用粉彩畫嘅畫。粉彩係一碌碌將乾、處於粉狀嘅顏料用結合劑（binder）固定成一嚿形成嘅棒，叫粉彩筆，粉彩筆因為已經係固體，所以畫粉彩唔係用支畫筆沾，而係將碌粉彩磨落去畫嘅表面上，等顏料因為磨擦力由支棒嗰度脫落，並且黐上去塊表面，形成有色彩嘅圖案。粉彩源於 15 世紀，而喺打後嗰幾個世紀，西人一路都有畫粉彩畫，都出咗唔少名作。

細分

粉彩分乾粉彩同油粉彩兩種，分別係乾粉彩用嘅結合劑淨係滑石粉同硫酸鋇等等嘅乾嘅物料，而油粉彩嘅結合劑就係少量嘅油同蠟。

乾粉彩可以整出不亞於第啲顏料嘅鮮艷色彩，不過因為乾粉彩呈固體粉狀（相對於處於液體狀態嘅油彩同水彩），所以喺繪畫技巧同畫作保存方法上同油畫以及水彩畫相當唔同：乾粉彩表面比較脆弱容易剝落，所以通常要加塊玻璃喺畫嘅表面先至容易保存，亦有做法係噴一浸固定劑（fixative）喺幅畫嘅表面上；只要做咗呢啲保存工作，一幅乾粉彩畫可以保存到成幾個世紀都唔變

安全

另一方面，因為乾粉彩呈粉狀，所以畫畫嘅人一路畫，就會一路吸入粉彩筆嘅顏料同結合劑，呢啲物質，特別係顏料，好多時帶有唔同程度嘅毒性，長遠嚟講可以對畫畫嘅人嘅呼吸系統健康造成危害，所以專門畫乾粉彩嘅畫家原則上都要做健康上嘅防護措施，包括用粒子過濾呼吸器（即係防微粒，唔防毒氣嘅豬嘴）或者安裝通風系統（即係工業級嘅抽氣扇），相對嚟講，油粉彩嘅油同蠟可以有效防止顏料飛起，大大減低咗吸入風險。

作品

• 
  路易十五嘅畫像，1748 年
  莫里斯·拉圖爾（Maurice La Tour）
• 
  《梳緊頭嘅女人》（法文：La Toilette）
  德加（Edgar Degas），1885 年
• 
  《花雲》（Flower Clouds）
  奧迪隆·雷東（Odilon Redon），1903 年
• 
  1925 年一幅粉彩畫

睇埋

• 油畫
• 蠟筆