胸甲騎兵
胸甲騎兵（Cuirassier），係裝備咗胸甲、馬刀同火器嘅騎兵，最早出現喺15世紀後期嘅歐洲。呢一個兵種繼承咗中世紀重騎兵響戰場上嘅地位，主要活躍喺16世紀中期至20世紀初嘅歐洲戰場。
史
編輯16-17世紀
編輯最初嘅胸甲騎兵同中世紀後期全副武裝嘅重騎兵好相似，佢哋戴全罩頭盔嚟保護成個頭，着住重型鎧甲保護成條頸同上半身、腳同膝頭嘅前側。胸甲騎兵同重騎兵最顯著嘅分別係佢哋唔再使用長槍或者戰錘，而係用輕便火槍同馬刀作為武器，另外佢哋為咗方便裝彈藥，唔再穿笨重嘅護手，並且亦都唔再用保護馬匹嘅鎧甲[1]。
16世紀中後期，隨住步兵長矛嘅廣泛使用同火器嘅興起，槍騎兵逐步退出歷史舞台，取代槍騎兵地位嘅胸甲騎兵開始一個獨立嘅兵種。到17世紀中葉，全身鎧甲逐漸過時，胸甲騎兵開始改着較為輕便嘅胸甲（法文：cuirasse），Cuirassier呢個名開始出現[2]。
18-20世紀
編輯胸甲騎兵着嘅盔甲隨住時代嘅演變逐漸減少，到18世紀末葉，胸甲騎兵嘅裝甲已經僅限於頭盔，只有法國、奧地利、普魯士同俄羅斯嘅胸甲騎兵仍然着胸甲。喺近代嘅燧發槍面前，胸甲已經好難為騎兵提供有效嘅防護。除咗增強衝鋒時嘅動量之外，胸甲發揮嘅作用已經主要係心理上面：一方面增強騎兵進攻嘅信心，一方面對敵人產生震懾作用。一戰爆發前夕，法國一共擁有12個胸甲騎兵團，德國有10個（其中2個係衛隊性質），俄羅斯有3個（都係皇家衛隊）。德國同俄國胸甲騎兵從19世紀末開始只係將胸甲作為和平時期嘅閱兵服裝。英國響拿破崙戰爭之後亦都為三個王室騎兵衛隊裝備咗胸甲，但係只有法國喺一戰開始之後將着胸甲嘅胸甲騎兵部隊投入實戰，直到1915年10月，着胸甲作戰嘅命令正式撤銷[3]。
20世紀以後
編輯現今仍然有騎兵部隊用胸甲作為正式場合閱兵時嘅穿着，包括英國王室騎兵衛隊、西班牙王室衛隊同意大利共和國總統衛隊等等，不過呢尐部隊大部分都唔用「胸甲騎兵」呢個名。