著長靴嘅貓

《著長靴嘅貓》（英文：Puss in Boots；德文：Der gestiefelte Kater）係一個童話故事，廣泛噉喺歐洲多地流傳。呢個故仔講到主角養咗一隻異常咁聰明嘅貓，隻貓識得好似人類噉著住靴用兩隻腳行路（長靴貓），而且佢仲用佢嘅機智嚟幫身無分文、出身寒微嘅主人得到權力同財富。

呢幅圖畫，描繪畫畫人想像中嘅長靴貓。幅圖描繪嘅係長靴貓喺河邊大嗌「救命呀！我嘅主人卡拉巴斯侯爵浸親呀！」。

早喺 16 世紀嗰時，個故仔已經有喺意大利嗰頭流傳。打後個故仔因為廣傳而出咗多個版本，當中有某啲版本就連《格林童話》都有收錄。廿世紀起最常見嗰個版本，係由法國作家沙略·佩羅寫嘅。

呔圖含意

故仔入便嗰隻著住長靴周圍行嘅貓，自稱叫 Monsieur Puss：

• Monsieur—簡單講即係法文先生噉解；
• Puss—英文入面對貓嘅可愛稱呼，大致即係貓貓噉嘅意思；

所以呢個名可以理解做貓貓先生噉嘅意思。

而 Puss in Boots 就可以解做著長靴嘅貓或者著長靴嘅貓貓噉解。

情節大要

以下講嘅情節，跟嘅係沙略·佩羅嗰個版本。

主角嘅背景

話說好耐好耐以前有個磨坊主人，佢有三個仔。呢位磨坊主人過咗身之後，佢座磨坊留畀佢大仔，佢隻驢就留畀佢二仔，而最細嗰個仔就得到佢阿爸嗰隻貓。細仔生得好靚仔，但身無分文又係平民出身。佢見到自己淨係得到阿爸隻貓，就唉聲嘆氣：

「唉，大哥可以靠磨麵粉嚟生活，二哥就有隻驢仔可以攞嚟做嘢。我呢？我諗我遲早都係窮到要焗住食咗隻貓。」

隻貓聽到新主人喺度自怨自艾，就噉講：

「喵。主人唔使閉翳。你畀個袋我同埋幫我準備一對靴。然後你就會知，你阿爸查實留咗樣正zeng3嘢畀你。」

阿細仔聽到，又覺得隻貓的確好聰明，諗住隻貓話唔定真係有計幫佢發達，於是佢就搵咗個袋同一對啱貓著嘅靴返嚟。隻貓得到想要嘅嘢之後，就孭起個袋同埋著起對靴，自稱係 Monsieur Puss－以下嘅篇幅，會嗌佢做貓貓先生。

貓貓有好橋

呢幅插圖描繪貓貓先生攞住自己殺死咗嘅兔仔。

貓貓先生第一時間去樹林，樹林裏面有好多兔仔。貓貓先生睏喺地上面詐死，等到有隻兔仔行埋嚟想摷佢個袋嗰陣，貓貓先生就一嘢殺咗隻兔仔。然後佢就將隻兔條屍袋doi6入袋，仲走去見國王。國王一接見佢，貓貓先生就攞佢殺咗嗰隻兔仔出嚟，噉講：

「喵。國王陛下，我代表卡拉巴斯侯爵（英文版：Marquis of Carabas）將呢隻兔仔送畀您。」

國王好高興噉收咗份禮。貓貓先生打後又好幾次噉殺兔仔嚟送畀國王，話件禮物係嚟自「卡拉巴斯侯爵」嘅，次次都氹到國王開心。

有一次，貓貓先生收到風，知道國王將會帶住公主出巡，出巡途中會經過某條河。貓貓先生就同主人講：

「喵。主人，如果你照我講嘅說話去做，你就會行好運。你去呢條河度沖涼，淨低嘅就交畀我。」

主人唔知貓貓先生諗緊乜，但係佢決定照做，走咗去條河度沖涼。佢沖吓沖吓，貓貓先生將主人啲衫收埋咗喺嚿岩石下面。過咗一陣，國王同公主坐住馬車經過。貓貓先生就大聲噉嗌：

「救命呀！我嘅主人卡拉巴斯侯爵浸親呀！」

國王聽到，就即刻由馬車嘅窗嗰度伸咗個頭出嚟睇。佢見到係貓貓先生，就下令叫啲守衛去幫卡拉巴斯侯爵。貓貓先生行去馬車側邊同國王講，話卡拉巴斯侯爵頭先沖沖吓涼，有班土匪走嚟偷走侯爵嘅衫。國王於是就命令啲僕人去佢衣櫃嗰度搵幾件靚衫嚟送畀卡拉巴斯侯爵。貓貓先生嘅主人著起國王送嘅靚衫，加上佢本人又生得有返咁上下俊朗，公主當場就對佢產生好感，國王同公主仲肯畀「卡拉巴斯侯爵」上車跟佢哋一齊出巡。

國王架馬車繼續行。貓貓先生有咁快得咁快跑，快過馬車去到啲田地嗰度。佢同班耕緊田嘅農夫講：

「你哋要同國王講，話笪地係屬於卡拉巴斯侯爵嘅。如果唔係，你哋就會被剁到變碎肉。」

班農夫畀佢凶到，就乖乖哋照佢說話做。過咗冇耐，國王架馬車經過。國王見到笪農地好靚，就問啲農夫笪地係邊個嘅。班農夫照貓貓先生意思，話笪地係卡拉巴斯侯爵嘅。國王心諗：

「卡拉巴斯侯爵係個人才。」

貓誅食人魔

貓貓先生繼續佢嘅計劃。佢走去笪地嘅真正主人嘅城堡。座城堡又大又宏偉，而座城堡嘅主人係一隻好有錢、識魔法曉變身嘅食人魔。貓貓先生行入城堡要求同城堡主人會面，話座城堡咁靚搞到佢好想向城堡主人致返個敬。食人魔聽到，就肯接見貓貓先生。

貓貓先生開口：

「喵，我敬愛嘅城堡主人，我聽講你有神力識變身喎。係咪真㗎？」

食人魔好得戚，即刻施展變身術，變咗做隻獅子，嚇到貓貓先生彈起咗。

插圖：貓貓先生前往食人魔嘅城堡。 插圖：貓貓先生前往食人魔嘅城堡。  插圖：貓貓先生同食人魔見面 －坐喺櫈上面畀人服侍嗰個，就係食人魔。 插圖：貓貓先生同食人魔見面 －坐喺櫈上面畀人服侍嗰個，就係食人魔。

食人魔變返原形之後，貓貓先生就繼續講：

「我亦都有聽人講，話你有能力變身做好細隻嘅動物... 例如係老鼠噉呢。不過我有啲唔係好信囉。」

「你唔信！？」

食人魔想證明佢法力係幾咁勁，即場用變身術變咗做隻老鼠。下一刻，貓貓先生就撲上去，將變咗老鼠嘅食人魔食落肚。

最尾嘅結局

就喺呢個時候，國王架馬車路經食人魔嘅城堡。國王同公主見到座城堡咁宏偉，忍唔住停低咗架馬車喺度觀賞。貓貓先生見狀就跑出去，行到去馬車前面。

「喵，國王陛下！歡迎嚟到卡拉巴斯侯爵嘅城堡！」

「嘩！乜原來卡拉巴斯侯爵座城堡咁宏偉呀aa4！」

國王同公主決定要入城堡參觀，於是「卡拉巴斯侯爵」就交佢隻手畀公主，拖住公主隻手跟隨國王行入城堡。佢哋仲享用埋食人魔本來準備嚟畀佢朋友食嘅盛宴。期間公主鍾意咗「卡拉巴斯侯爵」，國王仲即場提出想畀公主嫁畀卡拉巴斯侯爵－如是者，原本好窮嘅後生仔就做咗貴族，名成利就。

從今以後，貓貓先生亦都生活富足，捉老鼠淨係為咗過癮。

影響

2021 年影到，德國一地有座雕像描繪著長靴嘅貓。

内文：無敵貓劍俠

睇埋：史力加 2同睡公主 (芭蕾舞劇)

《著長靴嘅貓》相當出名，有多次噉畀人改編做電影等媒體嘅作品。

例如係夢工場嘅 2004 年電腦動畫奇幻片《史力加 2》噉：呢套戲同佢嘅相關作品惡搞咗大量嘅童話故事橋段，好似係灰姑娘、白雪公主同神仙教母等都係佢哋嘅惡搞對象，而《史力加 2》用咗著長靴嘅貓做佢其中一個主要角色；個角色大受歡迎，打後仲喺 2011 年嘅《無敵貓劍俠》同埋 2022 年嘅《無敵貓劍俠：8+1 條命》裏面擔正做埋主角。

好出名嘅芭蕾舞劇《睡公主》，亦都用咗著長靴嘅貓嚟做佢其中一個次要角色。

睇埋

• 反英雄：著長靴嘅貓被指係一個幾典型嘅反英雄，佢誅殺四圍害人嘅食人魔，救咗唔少人嘅命（英雄之舉）；不過佢為咗達到呢個目的而講咗唔少大話（英雄一般唔會做嘅嘢），而且佢誅食人魔嘅目的有一部份係為咗私利—佢主人名成利就，佢自己就可以嘆世界。
• 擬人化
• 招財貓
• 窮至有錢情節

拎

• 著長靴嘅貓 （英文），沙略·佩羅《著長靴嘅貓》嘅英文版。
• 文學 / 著長靴嘅貓 （英文），電視橋段網呢頁講《著長靴嘅貓》。