藍鬍鬚

《藍鬍鬚》（粵音：laam4 wu4 sou1；法文：Barbebleue；英文：Bluebeard），又有譯做《藍鬍子zi2》，係一個源自法國嘅民間故事。呢個故仔畀好多人覺得係兒童不宜，但曾經畀人當係童話噉出版，《格林童話》第一版入面都有收錄。

依幅 1901 年嘅插圖描繪藍鬍鬚將條鎖匙遞畀佢老婆。

呢幅 1875 年嘅插圖描繪女主角啲阿哥殺死藍鬍鬚，當中藍鬍鬚係著住紅色衫嗰個男人。

情節大要

話說好耐好耐之前，有個又有錢又有權嘅貴族男人，佢出嗮名個樣生得奇特，成面都係藍色嘅鬍鬚，所以畀人改咗個花名叫藍鬍鬚。藍鬍鬚先後噉娶咗六個老婆，但佢娶親老婆個老婆最後都會離奇失蹤。女主角係屋企嘅孻女，有一日藍鬍鬚嚟到佢屋企，同佢哋講話佢想娶女主角做老婆，仲即場請咗佢哋食餐大餐。女主角屋企全屋上下都好驚唔想個女嫁畀藍鬍鬚，但女主角見佢咁有錢，就自願話想做藍鬍鬚嘅老婆，肯搬去藍鬍鬚嗰間又大又豪華又偏遠嘅城堡嗰度住。

結婚嘅嘢搞好嗮，女主角到咗城堡，冇幾耐藍鬍鬚就話佢突然間有事要出遠門，要離開城堡幾日。臨走之前，藍鬍鬚交低一條神秘鎖匙畀女主角－女主角發覺條鎖匙可以打開城堡入面嘅任何一道門，間間房入面都有各種嘅金銀財寶，同時藍鬍鬚仲講低一樣嘢：

「

城堡最底有間密室，你鍾意去城堡邊間房玩都得，但絕對唔准入密室。

」

藍鬍鬚走咗之後，女主角一個人喺城堡有啲悶，就請咗佢家姐安妮（Anne）同埋幾個朋友一齊嚟開 paa1 ti4。玩吓玩吓女主角開始好奇，想知地底密室裏面有啲乜，點解會唔准入。最後佢終於忍唔住一個人落咗去開密室嘅門。

一入到去密室，女主角就發現間房成地都係血，而且牆上面仲有一個個鈎，藍鬍鬚打前嗰六個老婆嘅死屍就掛咗喺啲鈎上面。嚇到冇咗半條命嘅女主角一個唔小心，手上條鎖匙跌咗落地，沾到地上面嘅血。女主角執返條匙就即刻有咁快得咁快逃走，一路走仲一路想抹返乾淨條鎖匙上面嘅血。不過原來條鎖匙施咗魔法，啲血跡抹極都抹唔甩。

嗰晚藍鬍鬚提早咗返城堡。佢見到條鎖匙上面嘅血跡，知道女主角入過密室。大發雷霆嘅藍鬍鬚話要即刻殺咗女主角。而正當藍鬍鬚要落手之際，安妮帶埋女主角啲阿哥嚟到城堡，仲個個都擸嗮架生，最後眾人就郁手殺咗藍鬍鬚。

事後，藍鬍鬚啲財富同城堡就歸女主角擁有。女主角安排好好噉安葬藍鬍鬚頭嗰六個老婆，跟住就用佢得到嘅錢接濟屋企人，最後佢自己仲搵到個理想嘅伴侶。於是除咗藍鬍鬚之外，所有人都開開心心噉生活落去。

亦都有啲版本話女主角後嚟變做女版嘅藍鬍鬚－會係噉搵男人結婚，次次結咗婚之後都會殺咗自己個老公，再將條屍掛喺原先嗰間密室度。

影響

《藍鬍鬚》呢個故仔好出名，有畀人改編做戲同歌劇等嘅文化產物。

亦有好多創作品係取材自《藍鬍鬚》嘅，例如香港嘅二人音樂組合 Per se 就有首歌《無門》係取材自《藍鬍鬚》，亦可以睇吓美國 DC 漫畫《Fables》有用藍鬍鬚做佢其中一個主要角色。

睇埋

• 《美女與野獸》，都係講到有個後生靚女嫁咗畀一個個樣好怪嘅男人，不過《美女與野獸》入面嗰個怪男人唔係連環殺人狂。
• 恐怖故仔，有人話個故仔如果唔係講到有魔法嘅鎖匙，就會完全係恐怖故仔唔係童話。
• 血之女伯爵，有傳言話佢都係鍾意用後生女人嘅血嚟沖涼（似某啲版本嘅藍鬍鬚）。
• 連環殺手
• 亨利八世

拎

• 藍鬍子 - 米雪廣東話格林童話（佢啲情節同上面提到嘅版本有少少出入），YouTube
• Bluebeard（英文），英文版《藍鬍鬚》。