行星狀星雲

行星狀星雲係一種天體，係低質量恆星（質量係0.1至1個太陽質量）死嗰陣嘅一種狀態，外圍有由等離子構成嘅發光氣體外殼，中心就係裸露嘅核心（白矮星）。佢哋實際同行星無關係，只係因為通過光學望遠鏡睇落好似例如木星咁嘅巨型氣體行星，所以有呢個名。

貓眼星雲，行星狀星雲之一

概論

内文：發射星雲

行星狀星雲係發射星雲嘅一種，呢類星雲係低質量恆星（例如係太陽）生命終結嘅產物：喺一粒噉嘅恆星生命就嚟要結束，即係內部嘅氫燃料就快用完嗰陣，佢會演變成一粒紅巨星（red giant），並且將佢最外部嘅物料射向四周圍嘅太空，令到佢周圍嘅太空有咗一浸氣體喺度；而當佢喪失質量喪失到咁上下嗰時，佢會變成一粒白矮星（white dwarf）－佢溫度會上升，而且會開始射出大量嘅紫外線，啲紫外線會令到佢周圍嗰啲之前射咗出去嘅氣體離子化，跟手呢啲離子化嘅物料就會發光，形成一笪電離氫區（所以一嚿行星狀星雲實係本身識發光嘅）。呢啲機制喺行星狀星雲嘅外觀嗰度會睇到－行星狀星雲嘅一個大特徵係中心會有一粒星喺度發光。行星狀星雲通常頂櫳都只係會維持幾千年左右，以天文現象嚟講短暫得好交關。

根據天文物理學家嘅計算，太陽估計會喺 120 億年老嗰時變成行星狀星雲。