語言遷移

語言遷移（英文：language transfer）泛指一啲識得多隻語言嘅人用語言嗰陣，將一隻語言嘅特性用落另外一隻語言度。

母語嘅干擾

睇埋：第二語言習得

事實表明，當一個人學第二語言學到咁上下，就會開始喺腦海入面將 L2 嘅字詞同 L1 嘅對應，即係例如一個以粵語做母語嘅細路學英文，學到咁上下通常就會有

「Walk 對應行路」

「Eat 對應食」

「Drink 對應飲」

噉嘅諗法。但係事實表明，唔同語言之間好難吓吓做到完美一對一嘅對應，所以呢種「乜乜對應物物」嘅諗法好多時會搞到啲學生用 L2 嗰陣出錯。

正面定負面

廿一世紀初嘅語言學界一般認為，語言遷移可以分做兩大類：

• 正面：指 L1 嘅干擾有助個人學 L2；例如英文同德文都屬日耳曼語言，有好多字詞都好相似，甚至寫嗰陣會用同樣（或者大致同樣）嘅羅馬字母嚟寫—例子有英文 here 同德文 hier 呢兩隻字，簡化講都係相當於廣東話呢度噉嘅意思。喺呢種情況下，一個以英文做 L1 嘅人學德文嗰時會見到大量似曾相識嘅字詞，被指會覺得啲字詞易記咗。
• 負面：指 L1 嘅干擾妨礙個人學 L2；例子可以睇返上面提到，廿一世紀初嘅日本話缺少咗 [l] 同 [r] 之間嘅分界，搞到以日本話做 L1 嘅人習慣咗 [l] [r] 不分，要學好似英文呢啲會分 [l] 同 [r] 嘅語言嗰陣，佢哋成日因而遇到困難。

中介語係指一個人講嘢嗰時嘅特色，而呢啲特色係源自佢嘅 L1 嘅。