遺傳連鎖

遺傳連鎖（英文：genetic linkage，又叫做基因連鎖）講嘅係喺有性生殖中嘅減數分裂期，同一條染色體上兩個貼得比較近嘅基因嘅DNA序列好容易同時傳畀後代。如果兩個遺傳標記所在嘅基因座離得好近，噉佢哋喺染色體互換過程中分入唔同染色單體裏便嘅機會就細咗，好似連埋一齊咁，所以嗌佢做遺傳「連鎖」。換言之，同一個染色體上兩個基因離得越近，佢哋發生基因重組嘅概率就越低，就越容易同時傳落去。唔同染色體上嘅基因係完全唔連鎖嘅，但佢上便可能有害嘅等位基因嘅外顯度可能受其他等位基因嘅影響，而依啲其他等位基因可能喺第啲染色體上便。

遺傳連鎖係孟德爾定律最明顯嘅例外。第一次證實有遺傳連鎖嘅實驗係1905年做嘅。嗰陣時啲人仲唔明白點解有啲性狀會一齊遺傳。後屘研究揭示咗基因係同物理距離有關係嘅物理結構。

一般用厘摩（cM）單位來計遺傳連鎖嘅程度。兩個遺傳標記之間隔咗1 cM表示每100個減數分裂產物中，有1個裏便，嗰兩個遺傳標記分咗入唔同嘅染色體，或者每50次減數分裂就分咗1次。