點陣圖

  想搵一種電腦檔案格式嘅話，請睇BMP。

點陣圖（粵拼：dim2 zan6 tou4；英文：raster image）係 2D 電腦圖像一種，指根據某種座標系統（通常係笛卡兒坐標系統）嘅整數座標，將圖切割成若干叫做像素（pixel）嘅細等份，而每粒像素嘅顏色會透過某種數學模型（通常叫色彩模式）以數值形式表示；原理類似用原粒嘅紙皮石好整齊咁砌一幅壁畫出來。

點陣圖嘅例

點陣圖嘅精細度叫解像度。解像度愈高，幅圖就會愈精細，但同時亦都需要嘥更多嘅記憶體嚟保存。廿一世紀嘅電腦經已先進到幅幅圖像都閒閒地都有過 1,000,000 粒像素，用佢哋整嘅圖像就噉用肉眼睇望落好似冇點點噉，但係無論一幅電腦圖像幾精細都好，如果靠得夠近，係可以睇到佢由一點點組成嘅。

例

舉個例說明，喺用紅綠藍色彩模式（RGB model）將一幅圖存入去佢嘅記憶體嗰陣，如果用24位元表示一個像素（每種原色用8位元），部電腦會記住「[[207, 229, 78], [141, 159, 138], [146, 109, 81], ...]」噉嘅一系列數字，每組數字有三個數，每個最細係 0 最大係 255，第一個數代表嗰一點有幾多紅（R），第二個數代表嗰一點有幾多綠（G），而第三個數代表嗰一點有幾多藍（B），而成串嘢當中有 $n$ 組「每組三個數」嘅數－$n$ 就係幅圖嘅像素；最後形成一個矩陣，令到部電腦可以記住幅圖嘅樣。

混疊

因為點陣圖係由一點點組成，喺解像度夠低嘅情況之下（點先叫做低係要睇情況，冇一定準則），可能會判斷唔到原圖係乜；爾種同一幅點陣圖可以代表多過一幅原圖嘅現象叫 aliasing（混疊）。

喺某啲情況，例如如果幅點陣圖其實係熒幕上嘅字型，爾種現象可以係大問題；如果用例如中間色嘅技巧令人睇落去偏向覺得原圖只有一個可能，爾啲技巧叫 anti-aliasing（反混疊），但係因為聽落太似行話，好多時會用第個名叫，例如中文嘅 ｢圓滑字型｣。

相關技術

印刷品如果有相，就要用到一種叫做落網（screening）嘅工序，基本上係將張相變成一幅點陣圖。爾種工序即使以前未有電腦印刷都係咁做，但係方法係用光學技巧 ｢曬｣ 張相落一啲化學物質上面來產生網點。

睇埋

• 向量圖像