AEC Routemaster
AEC Routemaster係一款由英國Associated Equipment Company（AEC）出嘅一款雙層巴士，由AEC同埋倫敦運輸局合作設計。佢嘅設計工作早喺1947年開始，第一架車喺1954年亮相。Routemaster喺1958年投產，並一直出到1968年。
| AEC Routemaster | |
|---|---|
 長27呎半嘅倫敦紅色Routemaster巴士  長30呎嘅倫敦Routemaster客車  唯一嘅後置引擎版Routemaster | |
| 製造廠 | Associated Equipment Company 利蘭（兩架前置引擎樣辦車） |
| 邊道出 | 英格蘭美度石士/大倫敦，Southall地區 英格蘭蘭開夏（利蘭） |
| 製造年份 | 1954年—1968年 |
| 規格 | |
| 長 | 前置引擎（量產）： 27.5呎、30呎 後置引擎： 31呎 |
| 闊 | 8呎 |
| 引擎 | 前置引擎（量產）： AEC AV590/AV690 利蘭O.600 後置引擎： AEC AV691 |
| 波箱 | AEC半自動/自動波 |
紅色嘅Routemaster巴士喺倫敦服務四十幾年，更成為倫敦標誌之一。
設計
編輯AEC Routemaster嘅外形同當時嘅半駕駛艙式前置引擎雙層巴士相似，不過佢係一體化設計兼用咗多個新設計。架車係分開前後兩個副架（sub-frame），而車身係用鋁合金造，令架車輕啲之餘，重可以配合倫敦運輸局喺Aldenham Works搞嘅大修工序（將底架同埋車身分開晒做大修）。其中前面嘅副架上面有引擎、轉向系統同埋前懸掛系統，而後面嘅副架上面有尾軸同埋後懸掛系統，而波箱就裝喺車身結構下面、兩個副架之間。
Routemaster主要係配AEC AV590、AEC AV690或利蘭O.600引擎，配半自動或自動波，避震用螺旋彈簧，但有啲係用後氣墊懸掛。所有量產型巴士都係配Park Royal Vehicles車身。
另外Routemaster重有前獨立懸掛、動力輔助轉向同埋液壓制動。
倫敦運輸局
編輯倫敦運輸局第一架Routemaster（冧巴RM1）喺1954年亮相。架車係長27呎，引擎係當時RT用嗰隻款，配Self-Changing Gears（SCG）半自動波、Park Royal車身，未有動力輔助轉向，而水箱就擺喺引擎下低。RM1率先喺1956年2月8號投入服務。
第二架Routemaster（冧巴RM2）喺1955年出，改用AEC AV470引擎、Self-Changing Gears自動波，有埋動力輔助轉向，而水箱就擺喺引擎前面。1957年投入服務。
第三架Routemaster（冧巴RML3，1961年改叫RM3）喺1956年出，副架由利蘭出，改用利蘭O.600引擎、Weymann車身，車嘴設計改咗以方便司機睇位。1958年投入服務。
第四架Routemaster（冧巴CRL4，1961年改叫RMC4）係客車版，1956年出。副架都係由利蘭出，配利蘭O.600引擎、Eastern Coach Works車身，但冇動力輔助轉向。1957年投入服務。
經過多次改良之後，倫敦運輸局開始大買Routemaster。由1958年至到1968年，倫敦運輸局總共入咗2,756架Routemaster，分五個規格：
- RM系列：27呎半長巴士，總數2,120架（冧巴RM5-879、904-1253、1255-1452、1521-2217，全部油紅色），1958至1965年出
- RML系列（初頭叫ER系列）：30呎長巴士，總數524架（冧巴RML880-903、2261-2760，油紅色或綠色），1961至1962、1965至1968年出
- RMC系列：27呎半長客車，總數68架（冧巴RMC1453-1520），1962至1963年出
- RCL系列：30呎長客車，總數43架（冧巴RCL2218-2260），1965年出
- RMF1254：30呎長巴士，配前門（其他倫敦運輸局Routemaster都係尾門），油紅色，1962年出
大部分量產型Routemaster係用AEC AV590引擎，但部分RM系列係用利蘭O.600，而RCL系列係用AEC AV690。紅色Routemaster用自動波，而綠色Routemaster就用半自動波，Routemaster客車有電動車門。
喺倫敦市區，紅色Routemaster巴士係用嚟取代市內嘅無軌電車，成個計畫喺1962年完成。之後引入嘅紅色Routemaster就係用嚟取代車隊入面嘅RTL/RTW系列雙層巴士（特別設計嘅利蘭泰坦）。綠色嘅Routemaster巴士係用嚟行倫敦郊區線，而綠色嘅Routemaster客車就用嚟行倫敦運輸局旗下嘅Green Line路線。
至於架RMF1254喺出廠之後，倫敦運輸局一直冇將佢派出服務。架車被送出去畀英國其他巴士公司試。
1970年1月1號，倫敦郊區線同埋Green Line路線俾新成立嘅London Country Bus Services接收，啲綠色嘅Routemaster（唔包括改咗油紅色嘅3架RML巴士）亦同樣轉移至新公司。後來，London Country嘅Routemaster面對零件唔夠嘅問題，最後一架喺1980年退出London Country巴士服務。London Country留咗RMC4，另外RML2423同埋RML2424喺1979年拆咗，而其餘嘅都賣晒畀倫敦運輸局。
喺1970年代，倫敦運輸局引入二千幾架丹拿/利蘭珍寶（DM/DMS系列），以引入當時英國開始流行嘅一人控制模式同埋取代Routemaster嘅地位，但最終DM/DMS系列提早退役，而Routemaster就繼續行落去。
1982年開始，倫敦運輸局因為巴士客量下降等因素，搞到多咗車出嚟，喺之後幾年有多架RM/RCL系列巴士退役，其中多架車被送去英國其他地方行。
踏入1990年代，倫敦重有多架Routemaster行緊（包括大部分RML巴士），兼且車上繼續有人賣飛，其中幾百架Routemaster喺呢段期間被翻新（換埋引擎）。2001年起，再有多架喺倫敦以外行嘅Routemaster經過翻新之後返倫敦繼續行。
2003年起，倫敦剩低嘅Routemaster亦逐步退役，俾低地台巴士取代（有啲係改用平治Citaro G掛接巴士）。2005年12月9號下晝，當最後一架Routemaster行完159線班次之後，Routemaster正式結束喺倫敦嘅常規巴士服務。
2005年11月14號，兩條「文化遺產」路線9同埋15開辦，用車係2001至2002年俾Marshall Bus翻新過嘅Routemaster。9號線已經喺2014年7月25號取消，而15號線過咗2019年9月29號之後亦都冇再行。[1][2]
2022年10月15號開辦、由Londoner Buses營運嘅「文化遺產」私營路線「A線」，都係指定用Routemaster嚟行。[3][4]
英國其他公司
編輯由於Routemaster嘅一體化設計比起底盤加車身嘅配搭複雜，兼且車身冇得揀，所以喺倫敦以外冇乜巴士公司買。
Northern General喺1964至1965年間入咗50架長30呎嘅Routemaster，佢哋係配前門，用利蘭O.600引擎同埋AEC Monocontrol半自動波。1966年Northern General買埋換咗利蘭O.600引擎嘅倫敦運輸局RMF1254。51架Routemaster喺1980年或之前退役，其中有少部分買咗去倫敦。
另外British European Airways（1974年同British Overseas Airways Corporation合併成英國航空公司）喺1966至1967年間入咗65架長27呎半嘅Routemaster，佢哋係配前門，用AEC AV690引擎，車尾拖住Marshall出嘅行李車，用嚟行倫敦至希思魯機場嘅機場巴士線。佢哋喺1975至1979年退役，全部賣晒畀倫敦運輸局，成為RMA系列。
後置引擎版Routemaster
編輯1964年，AEC開始研製後置引擎版Routemaster。佢個結構用返前置引擎Routemaster嗰種，兼且大部分零件可以同前置引擎Routemaster共用，不過車門擺喺前輪跨，即係巴士最前面。架車係用AEC AV691引擎，車身都係由Park Royal出，全長31呎。
不過當時AEC已經係利蘭附屬公司，而利蘭已經有另一款後置引擎雙層巴士利蘭Atlantean，所以後置引擎版Routemaster冇投產，兼且只得一架樣辦車出廠。
嗰架後置引擎版Routemaster喺1966年交貨畀倫敦運輸局，並喺1967年投入服務。後來架車被編去做觀光車，1983年退役之後入咗倫敦運輸博物館。
出路
編輯Routemaster巴士退役之後，好多都被用作其他用途。
喺1980年代，多架退役嘅Routemaster被運去英國多個地方繼續城市巴士服務，不過現時絕大多數已經退役。另外Routemaster巴士亦有被用作租車同埋觀光車。除此之外，亦有多架Routemaster成為收藏品。
另外亦有Routemaster被運出口，作觀光或其他特別用途。
類似設計
編輯踏入21世紀，有幾個引入咗AEC Routemaster設計概念嘅雙層巴士出現，包括：
- New Routemaster－由2008年上任嘅倫敦市長Boris Johnson提倡，由Wright Group出，2012年開始喺倫敦行。
- 宇通ZK6116HGS－喺中國大陸行嘅宇通ZK6116HGS嘅特別版，外型同Routemaster相似，2011年開始喺馬其頓Skopje行。
- Troliga Sirius－由斯洛伐克嘅Troliga Bus出嘅雙層巴士，車嘴設計同Routemaster相似。
參考
編輯- ↑ Bus service proposal: Route 9 互聯網檔案館嘅歸檔，歸檔日期2021年9月28號，. Transport for London
- ↑ "TfL confirms Heritage Routemasters won't return". keybuses.com. 喺10 April 2021搵到.
- ↑ "Londoner Buses - See London by heritage bus!". www.londonerbuses.co.uk (英文). 原著喺2022-11-28歸檔. 喺2022-09-28搵到.
- ↑ Waywell, Chris. "There's a new regular London bus route using vintage Routemasters". Time Out London (英國英文). 喺2022-10-16搵到.
出面網頁
編輯